المهدى غير المنتظر

ما هو إحنا مش ملطشة.. كل شوية يطلع لنا واحد مريض نفسى، عنده حب ظهور عشان يقعد يخترع والناس تمشى وراه، هو إحنا ما صدقنا خلصنا من توفيق عكاشة، وإلهامى عجينة، عشان يطلع لنا الشيخ ميزو؟ اللى طالع يقولك أنا المهدى المنتظر وبدعو شعوب الأرض لمبايعتى.. المشكلة إن ميزو طلع معاه مشايخ حب الظهور اللى على الناحية التانية زى مظهر شاهين وغيره، عشان يردوا عليه، وتتقلب سويقة، وإحنا قاعدين بينهم فى النص، اللهم لا تؤاخذنا بما فعل السفهاء منا.

مفيش فايدة
حضرتك عيان، واللى بتاخدها دى مسكنات، بتضحك على نفسك بيها، لكن الحقيقة إنك مش هتخف بيها، لأنك عيان، وأنت شخصيا عارف إنك عيان، والدنيا كلها عارفة إنك عيان، ولو ما اتعالجتش عدل هتموت.. الكلام ده موجه للجنيه، ربنا يقومه بالسلامة، لا تعويم هينفع، ولا قفل سوق سودا ليه معنى، اتشقلبنا وعملنا أكروبات ونزلنا الدولار اتنين تلاتة جنيه، لمدة أسبوعين، بس مفيش فايدة، الدولار طلع تانى، ورسمى فهمى نظمى، ولسه، اللى جاى باين، بس إحنا اللى عاملين نفسنا مش واخدين بالنا.