أحمد عفيفي يكتب: الألف «مأتم » والمطرية !!!

مصيبة سودا اني لو قلت رأى مخالف لجموع كثيرة ابقى ابن كلب وعميل وطابور خامس والذي منه من جملة الاتهامات الكثيرة اللي نازلة مغرقانة من ساعة زفت الطين مرسي ماحكم البلد في يوم مشؤوم مطلعتلوش شمس .. امبارح نزّلت بوست على صفحتي ع الفيس .. وكل من يقرأني ويفهمني جيدا يدرك تماما أنني ضد الإخوان قولا واحدا .. وقد نالني من اللجان الالكترونية اللي كانت شغّالة الله ينور ايام حكم المدعوق مانال كثيرين غيري .. فقط لأننا نقول عكس مايريدون .. فإذا كان هذا الأمر تحديدا " ان لم تكن معي فأنت ضدي " سيفرض نفسه فرضا هذه الأيام .. فابقى سلم لي ع الثورتين .. ومتنساش تقرا الفاتحة على أرواح الشهداء اللي ماتوا عشان كل واحد يقول رأيه بحرية ، من غير مايخاف من اللي " فوق " ، احسن يجيبه ويدفنه " تحت " الأرض.؟
طيب ايه اللي انا كتبته امبارح ع البوست؟ .. قلت : فيه حاجة غلط .. لمل يتقتل في الألف مسكن والمطرية 60 واحد .. من اللي كانوا بيتظاهروا .. ولما نعرف انهم كانوا مسلحين وميموتش حد من الطرف المواجه .. شرطة او جيش .. يبقى الواضح للعيان ان العنف تخطى حدود العقل وان الضرب كان في المليان بالأوي وده غلط .. بمجرد ما كتبت البوست ده لقيت امة لا اله الا الله نازلة في العبد لله توبيخ واتهامات واني واني .. ليه ؟ .. لمجرد بس اني قلت رأى مش على هوى من يعتقد بعكسه.
انا فاكر بعد فض رابعة العدوية والنهضة اني كتبت ، حتى لو افترضنا ان اللي ماتوا هناك 5000 مش 600 حسب ماهو معلن .. يستاهلوا .. لأن الشرطة أنذرتهم اكتر من الف مرة .. اخرجوا اخرجوا .. متخليش اللي شايل سلاح يحطك في المواجهة .. لأني حضربه وممكن انت تموت .. ومفيش فايدة .. ركبوا دماغهم وأصروا .. فماتوا .. انت حر .. انا نبّهتك وحذّرتك وانت معملتش بالنصيحة .. لكن في الألف مسكن والمطرية الوضع مختلف .. شوية من المعارضين للي بيحصل ومش عاجبهم انك تشيل صورة السيسي وتقول رئيسي .. قام استغل الإخوان الموقف ودخلوا عليهم .. او ركبوهم واستقوا بيهم .. وسمعنا عن نية اعتصام في المطرية ومحاولة بناء خيام .. قامت الشرطة فاتحة النار ع الكل ، فراح حسب ماهو معلن حوالي 60 واحد .. من الاخوان ومن المعارضين اللي مش اخوان ، ومن ناس تانية كانت بتتفرج .. يبقى غلط ده ولا صح؟.
انا عارف ان الاخوان بغبائهم الشديد اللي مالهوش مثيل فقدوا مجرد تعاطف عيّل صغير في الشارع معاهم .. والشرطة باللي راح من ولادها ولسه بيروح بتغلي منهم غليان مالوش حدود .. وبرضه هناك كراهية متبادلة – شئنا أم أبينا موجودة – بين الشرطة ومن هم محسوبين على ثورة 25 يناير .. بس لا يمكن النتيجة تكون بالقتل الصريح وبقلب جامد وبثقة تامة ان محدش حيحاسبنا .. غلط ومليون غلط .. وده رأيي .. أقوله وأجري على الله.
طيب مين جاب سيرة اللي حصل في الألف مسكن والمطرية في برامج التوك شو امبارح .. تلاتة حسب ماشفت .. دينا عبد الرحمن على سي بي سي وابراهيم عيسي على اون تي في والابراشي على دريم .. دينا سمعت للرأى المعارض .. وسمحت للي قال غلط انه يقول رأيه .. وجابت خبر موجع ومؤلم ان مشرحة زينهم رافضة استلام جثث لامتلاء الثلاجات عن أخرها .. وابراهيم عيسى قال هناك عنف مفرط في الألف مسكن والمطرية .. وغلط .. واللي مش شايف انه عنف ومفرط يبقى مش بيشوف .. وبعدين قال فيما معناه في سياق الكلام ان كنت ناوي تحطني في خانة الخونة والعملاء لأني بخالفك في رايك يبقى سلم لي ع البذنجان .. وانبسطت جدا انه جاب حافظ ابو سعده بتاع حقوق الانسان .. كان ممكن جدا يجيب اى حد تاني في الفقرة التانية بتاعته ويكتفي بقول رايه ان كان هناك عنف مفرط في المنطقتين .. لكنه محبش - من المهنية والأمانة - ان الامر يمر مرور الكرام وكأن مفيش حاجة حصلت .. 60 واحد ماتوا .. ما احنا مات من عندنا كتير!
اما الابراشي وده بقى هو الإعلام الموجه زي الكتاب مابيقول .. فكل تركيزه على انتهاكات الإخوان وضحاياهم .. وبقى ممل جدا ومفيش على لسانه غير الكلمة دي .. " شوفوا اللي بيقولوا على نفسهم مسلمين .. بيعملوا ايه .. هو الاسلام قال لك تصلي الفجر وتقتل ؟" .. وأذاع طبعا لقطات من المطرية ، بس لا قال كام واحد اتقتل هناك ولا جاب سيرة مشرحة مش لاقية مكان للجثث .. ودافع بعدم مهنية ولا موضوعية عن حق الشرطة في اللي عملته.
طيب الفيس مليان بصور الناس اللي ماتت في المطرية واكيد ليهم اهل وموجعين .. يا أخي فيها ايه لو تعرض لقطات من قتلى الطرف الاخر ، انشالله حتى تقول عليهم يستاهلوا .. او تسجل مع أم واحد منهم ويمكن تقولك : ياما حذرته انه يسيبه م الاخوان والسياسة والهم الازرق ده ، بس مسمعش كلامي .. يعني ممكن تبقى بذكاء تبدو طبيعيا وموضوعيا في العرض ، وبرضه تصيب الهدف بتاعك.
م الأخر عشان انا طوّلت .. اعلامنا ماشي في سكة ضلمة .. سكة سودا .. اتجاه واحد .. ودي سكة اللي يروح ميرجعش .. وكمان مرة واعيدها سلم لي ع الثورتين ومتنساش - كمان مرة برضه - تقرا الفاتحة على أرواح الشهداء اللي لو كانوا يعرفوا ان النتيجة حتبقى كده مكنوش نزلوا من بيوتهم من اساسه .. الله يرحمهم .. وكلنا - نعم كلنا - منستهلش تضحيتهم ودمائهم الطاهرة النبيلة!!