إكرامى ل"خالد صلاح": "موعد فرح رمضان صبحى وبنتى هيكون مفاجأة"

قال الكابتن إكرامى الشحات، حارس الأهلى والمنتخب الوطنى الأسبق، إنه عندما يتحدث مع رمضان صبحى، نجم النادى الأهلى، يستشعر أنه يتعامل مع طفل، مضيفًا "رمضان صبحى حدوتة، وتصرفاته صبيانية، والولد بالفطرة ومعندهوش خبث ولا لف ولا دوران واللى فى قلبه على لسانه".

وعبر "إكرامى"، خلال حواره مع الكاتب الصحفى والإعلامى خالد صلاح، ببرنامج "على هوى مصر" المذاع على فضائية النهار one، عن حبه الشديد لرمضان صبحى، مضيفًا "بموت فيه من قبل ما يتقدم لبنتى"، مشيرا إلى أنه عندما عرض أمر زواج رمضان صبحى على ابنته على أشخاص ممن يثق فيهم، رحبوا كثيرا بهذا، وقالوا له إن الزواج المبكر بالنسبة للاعب الكرة هام جدا، مضيفا "واللى عجل بالخطوبة، موضوع سفره وهو طلب منى إنه يبقى فى حاجة رسمى قبل ما يسافر، والخطوبة كانت حاجة ضيقة جدا ومحدش اتعزم فيها خالص بما فيها إخواتى، بس هصالحهم إن شاء الله".

وأوضح نجم الأهلى الأسبق، أنه رأى الفرحة فى عيون الناس الذين يباركون خطوبة ابنته على رمضان صبحى كثيرًا، "حسيت بفرحة من عيون الناس"، وتابع "الجواز ده بطيخة وإحنا توكلنا على الله ودى بتاعة ربنا".

وكشف إكرامى الشحات، عن كواليس تقدم رمضان صبحى للزواج من ابنته، حيث كانت بداية الكلام فى هذا الموضوع عن طريق زميل له فى النادى الأهلى، فعرض الأمر على شريف إكرامى، الذى سعد كثيرا بعد عرض الموضوع عليه، مضيفًا "شريف حاسس إن الولد من تعامله معاه داخل الفريق إنسان مؤدب ومحترم وبيصلى وبيعرف ربنا كويس، ومبدأ الفقر والغنى بالنسبالى ملهوش قيمة خالص عندى".

وتابع: "شريف قالى الولد كويس وأسرته ناس طيبين، بس سيبى أقعد أتكلم معاه شوية، ورمضان ماتكلمش مع شريف فى الأول علشان كان خايف من حتة إنه يحصل نوع من الرفض"، مردفًا "بتعامل معاه زى شريف على إنه ابن تالت، وأحيانا بتكلم معاه جد وبقعد أضحك علشان الولد لذيذ ودمه خفيف".

ولم يعلن إكرامى عن موعد زفاف رمضان صبحى على ابنته وأكد أنها ستكون مفاجأة للجميع.