صحافة المواطن:طفل مصاب بضمور فى المخ..ووالده يناشد المسئولين لعلاجه بالخارج

استمرارًا لتفاعل قراء "اليوم السابع" مع الخدمة التى أطلقها الموقع تحت عنوان "صحافة المواطن"، للمساهمة فى تحرير المواد الصحفية، وتوثيقها بالصور والفيديو، أرسل المواطن محمد أحمد، والد الطفل أحمد، البالغ من العمر 4 سنوات، مأساة نجله بعد إصابته بالتهاب فيروسى حاد فى المخ.
ويحكى الوالد معاناة طفله مع المرض، قائلاً: "كان طفل طبيعى زى باقى الأطفال، والسنة اللى فاتت جاتله حالة سخونية عادية، لكنها فجأة أدخلته فى تشنجات ورحنا بيه على أقرب مستشفى، وبعد تخديره 3 مرات مع تكرار التشنجات، الدكتور طلب مننا نشوف مستشفى يكون فيها عناية مركزة وعربية إسعاف عشان تنقله، بعد الاتصالات والبحث الحمد لله كان فى مكان فى مستشفى الأطفال جامعة عين شمس "الدمرداش"، وبعد 5 أيام من الفحوصات الطبية والتحاليل والأشعة المختلقة توصلوا إلى إن الحالة التهاب فيروسى حاد فى المخ، كما هو موضح بالتقرير الطبى".
وتابع قائلاً: "الولد فضل فى غيبوبة تامة من لمدة تجاوزت الشهرين، وتم طلب علاج منا وهذا العلاج غير متاح فى مصر، وربنا كرمنا بالناس اللى ساعدتنى ووفروه من الخارج، وكان المفترض أن هذا العلاج سيحسن الحالة ويعيد الوعى إليه، ولكن الحمد لله لا اعتراض على حكمه، الالتهاب الفيروسى أدى إلى ضمور حاد فى المخ وله تأثير على أغلب الحواس فهو الآن مصاب بأصعب أشكال الشلل الدماغى، فقد كامل للإبصار، فقد كامل الكلام، فقد كامل للحركة، وتيبس حاد بالعضلات".
وواصل قائلاً: "بعد فترة المعاناة فى غاية الصعوبة داخل المستشفى الجامعى وندرة العلاج والمستلزمات الطبية أثناء وجوده فى العناية المركزة، لنخرج الآن إلى حياة ووضع غاية فى الصعوبة فهو يعانى من سخونية شبه مستمرة، وهو ما يؤدى إلى أننا مش بنقدر نروح بيه العلاج الطبيعى كل ما يكون فى سخنية ما ينفعش نعمل علاج طبيعى، ودى معاناة تانية أنا ساكن فى مدينة السلام والعلاج الطبيعى يومين فى الدمرداش، وثلاث أيام فى مركز علاج طبيعى بعين شمس، طبعًا بالإضافة للمعاناة مع السخونة.
واختتم قائلاً: "أرجو منكم مجرد تخيل المعاناة اللى إحنا كلنا عايشينها مش بس أنا وزوجتى وبنتى الطفلة الصغيرة اللى فجأة أخوها كان بيلعب معاها وبعد كده حصله كده، أنا مش معترض على حكم ربنا.. لكن كل لحظة بتعدى عليا بموت فيها 100 مرة وأنا مش بايدى حاجة أعملها، وبالأخص لما الولد بيدخل مثلا فى نوبة تشنجات وأنا فى التاكسى فى طريقى للعلاج الطبيعى، أرجو من حضرتكم تتصور معاناة يوم واحد مع هذا المرض الصعب النادر، أنا مش محتاج لمساعدة مالية أنا عايز ابنى يتعالج بره مصر، وده رأى كل الأطباء اللى بيتابعوا حاله أحمد.. كلهم شايفين أن العلاج بالخارج مهم وهيجيب نتيجة بسرعة نظرًا لتقدمهم وتقدم الأجهزة لديهم".
شاركونا فى تحرير المواد الصحفية المنشورة على الموقع بإرسال الصور والفيديوهات والأخبار الموثقة لنشرها بالموقع والجريدة المطبوعة، ليتم نشر الأخبار المصورة والفيديوهات باسم القراء، وذلك عبر البريد الإلكترونى send@youm7.com، أو عبر رسائل فيس بوك، على أن يتم نشر الأخبار المصورة والفيديوهات باسم القراء.
موضوعات متعلقة:
صحافة المواطن .. القمامة تحاصر شوارع مدينة العبور وسط تخاذل المسئولين