بالفيديو..منة طالبة الحقوق من "صبى قهوجى " لصاحبة "كافتيريا":نفسى "النصبة" تكون عالمية

"أيوة جاى ..وعندك واحد قهوة وصلحه .. وواحد شيشة هنا "هذه الجمل اعتدنا سماعها من صبى قهوجى عندما يطلب إعداد الطلبات لأحد الزبائن لكننا ولأول مرة نسمعها من فتاة تعمل بمقهى ، وتخططى الحاجز النفسى لمهنة ل"الرجال فقط" .
"منة" الطالبة بكلية حقوق كسرت هذه التقاليد والعادات القديمة التى نشأنا عليها وقامت بالعمل بهذه المهنة حتى أنشأت كافتيريا خاصة بها وأطلقت عليها اسم "النصبة "
"فيديو 7 " قناة اليوم السابع المصورة ، التقت منه عن قصتها قائلة :"أنا اسمى منة الله الحسينى عندى 25 سنة بدرس فى كلية الحقوق جامعة القاهرة اشتغلت فى الأول بائعة بمحلات بعد كده زهقت لأنى حسيت إنى مش بعمل حاجة مفيدة دورت على وظيفة جليسة أطفال وروحت مكتب التوظيف رفضوا وقالولى مش هينفع نشغلك لأن شكلك بنت ناس فقررت اشتغل صبى نقاش لكن مفيش نقاش وافق يشغلنى معاه واشتغلت فترة موديل وبعد كده اشتغلت صبى قهوجى فى قهوة فى وسط البلد لمدة أربع شهور لحد مافهمت الشغلانة ".
تتحدث منة عن "النصبة " قائلة :"قررت أعمل مشروع صغير فى وسط البلد وهو عبارة عن نصبة شاى لكن مختلفة "مودرن" بتقدم مشروبات مختلفة لكن بعد كده حصلت مشاكل مع البلدية والحى ومع الجيران وكان فيه بلطجية بيفرضوا عليا أدفع إتاوات وكتر المشاكل خلت الجيران تطلب إنى أمشى".
تابع :"قررت أفتح النصبة تانى وما استسلمش" وكتبت على "الفيس بوك "بوست إنى عايزة حد يشاركنى فى عمل مشروع والناس بدأت تسأل عن مشروع "النصبة" لحد ما اخترت شريك مناسب أثق فيه ودورت على محل مناسب وفتحت النصبة تانى"
عن أمنية منة تقول :"نفسى النصبة تكون كافيه عالمى بإدارة مصرية .. و أقدر أقول إن مصر طلع منها حاجة وفخورة بمشروعى لأنى حاسة إنى كسرت البطالة والطبقية والتقاليد الاجتماعية"