عشرة أسباب لكى تدخل كلية الصيدلة

أولا كلية الصيدلة كغيرها من كليات القمة تعطيك برستيج لا يتوفر فى غيرها من الكليات فتصبح الدكتور راح الدكتور جه.
أما لو كنت من منطقة شعبية، فأنا أضمن لك أن تصبح رمز الطب فى المنطقة، فلن يخلو باب بيتك أبدا من إحدى الجارات التى تسألك عن أفضل دواء للسكر أو الضغط أو مفاصلى بتوجعنى يا ابنى وحاسة إن جسمى مكسر) أو حتى عن أحسن مرهم لتسلخات الحفاضات، وده بالرغم أنك ممكن تكون فى إعدادى لسه وما أخدتش غير نبات وحيوان ولسه مدخلتش على البنى آدمين يا معلم.
دخولك الصيدلة يجعلك مفخرة الأسرة، فلن يخلو حديث والدك أبداً من كلمة (وابنى الدكتور فلان عمل كذا أو ذهب إلى الحتة الفلانية)، أو حتى لما يقدمك لحد متعرفوش أقدملك ابنى الدكتور فلان كلية صيدلة يتحدث عنك كأنك عميد الكلية مش لسه مجرد طالب.
أما إذا كنت من النوع اللذيذ اللى بيقلب الفلوس على السيد الوالد، فهذه فرصتك فلا تتردد فتستطيع أن تسحب كل شوية فلوس على حس الكتب وأدوات المعمل والكورسات آه مش كلية عملية بقى وضحيت عشان تحقق حلم السيد الوالد أن يكون له ابن دكتور يبقى يدفع بقى يا عم وإلا والله أحول بكره آداب.
دخول الصيدلة يحميك من كل تلك الإتاوات اللى يفرضها عليك عمال وفنييى المعامل فى الكليات الأخرى، خصوصا طب وعلوم وكل سنة وأنت طيب يا دكتور والتى لا تعرف لها أى مناسبة ربما هو عيد ميلاد العامل نفسه أو حتى النظرات الصامتة من طراز تعاطفك لوحده مش كفاية ولازم تدفع نصف جنيه عشان تاخد كراسة العملى أما لو مكنش معاك فكة فسيب الجنيه لأخوك بنية صافي.
دخول الصيدلة يمنحك الحرية اللى تتمناها، فيمكنك أن تتأخر لأى ساعة من الليل بحجة إن عندك سكاشن سوارييه أو كان عندك كورس وعندما يكلمك والدك على الموبايل فتخبره أنك مش لاقى مواصلات عشان السواقين عاملين إضراب عشان ارتفاع أسعار البنزين، وإنك زعلان جداً عشان التأخير بينما أنت زعلان عشان زيدان اتصاب وأنت بتلعب بلاى استيشن مع وائل عند أحمد فى المحل.
دخولك الصيدلة يجعلك عريس لقطة لأى واحدة على أساس أنك صيدلى بقى وبتلعب بالفلوس لعب (ميعرفوش اللى فيها)، خصوصا لو زوجتك مش صيدلانية يعنى أما لو اكتشفت الحقيقة بعد الجواز وأنك يا مولاى كما خلقتنى فبتكون الفاس وقعت فى الراس وخلاص ادبست يا معلم وسلملى على الشفافية.
دخولك الصيدلة وعدم دخول الطب يحميك من كل التبعات التى تأتى بعد ذلك من الإصابة بالربو نتيجة استنشاق الفورمالين فى المشرحة إلى تنطيط واحد بتاع دبلوم عليك لأنك مدير الوحدة الصحية(ومانتش لابس البالطو ليه يادكطور) إلى تحكم الدكتور الللى أنت بتعمل رسالتك تحت إشرافه فيك وطلبه منك أشياء غريب (وعايز منك دراسة للدورة الدموية لفار أمه ميتة ومراته اتطلقت منه واتجوزت تانى(.
دخولك الصيدلة يحميك من نصب الأطباء معدومى الضمير (على أساس أن مبروم على مبروم ميلفش)، فتذهب إلى هذا الطبيب تشكو من آلام فى الظهر فيكتب لك على مسكنات فبالإضافة إلى نوعين أو ثلاثة من الفيتامينات (وده على أساس أيه يا معلم شايفنى بطوح قدامك من التعب) وهكذا تذهب إلى الصيدلية فتحضر المفيد فقط وتلقى بقية الروشتة فى اقرب سلة مهملات.
دخولك الصيدلة يتيح لك فتح صيدلية وبالتالى تحصل على أى دواء تحتاجه دون أن ينظر لك أحد كده ولا كده كما يتيح لك أيضا الحصول على تلك الأدوية التى تسهل لك أمورك فى جميع المصالح والهيئات الحكومية حتى لو كانت المطار.
وأخيراً مزاجك يا أخى تدخل صيدلة.. حد ليه حاجة عندك؟