أكثر من 655 كيلومترًا تفصلهما للمرة الأولى عن بعضهما البعض لتصبح الخطابات للمرة الأولى وسيلة التواصل الوحيدة بينهما فى عصر إنشاء السد العالى حيث لم تظهر أية وسيلة تواصل أسرع. هذه الحبكة المعقدة التى استطاع الشاعر العبقرى "عبد الرحمن الأبنودى" أن يسلط الضوء من خلالها على الكثير من الأشياء من بينها طبيعة العلاقة بين "حراجى القط" العامل فى السد العالى، وزوجته "فاطمة أحمد عبد الغفار". ولأن العالم اليوم يحتفى باليوم العالمى للبريد، ولأن وسائل التواصل الحديثة خطفت الاهتمام من الخطابات نتذكر معًا أهم الرسائل التى تضمنتها خطابات "فاطمة أحمد عبد الغفار" الفلاحة الذكية العاشقة التى تجيد التعبير عن نفسها رغم أنها لم تتعلم يومًا القراءة والكتابة.. والتى أحيانًا ما يكون خطابها الواحد محملاً بمئات الرسائل. "الرسالة الأولى عن حالها فى الغياب" اتأخرت مسافة كبيرة كبيرة علىّ عارف فاطنه يا حراجى لاليها عايل.. ولا خى ليه تتأخر كده يا حراجى..؟ طب والنبى كأن ورقتك دى أول قنديل يتهز ف جوف الدار أول ندعة ضو الدار من غيرك يا أبو عزيزه .. هِوّ . وعزيزه وعيد .. من غيرك يا حراجى زى اليُتما فى العيد . الواد على صغره حاسس بالغربه والبعد . ولا عاد حتى بيطلع يلعب فى القمَارى مع الولِد . اطلع وأخش .. أطلع وأخش القاه .. غيمان وكأنه محروق له دكان . ويقوللى: ((فين يامه أسوان.. ؟ وأبا سابنا ليه يا مه؟ ما يمكن زعلان..؟)) "الرسالة الثانية عن العتاب" شهرين يا بخيل؟ ستين شمس وستين ليل؟ النبى يا حراجى ما أطول قلبك لاقطع بسنانى الحته القاسيه فيه "الرسالة الثالثة.. الدعاء" وصلنا الطرد وجانا المبلغ يا حراجى.. أحياك الرب وأبقاك ألفين عام .. ولا عاد يقطعلك عادة ولا حس.. ولا يقفل لك كف .. ولا يطوى من قدامك سجادة الخير والسعاده .. "الرسالة الثالثة.. تخفف الهم" أما بعد .. فإحنا وزعنا المبلغ زى ما قلت.. ولعلك ما تشغلش بالك فينا وتبقى فى راحة بال .. إحنا يا حراجى – بعيد الشر- إن ضاقت بينا الحال يكفينا ريال كفايه علينا البسطاوى الظهر يخطى عتبة الدار "الرسالة الرابعة عن الشوق" فى الليل يا حراجى تهف عليا ما عرف كيف .. هففان القهوه .. على صاحب الكيف .. وبامد إيديا فى الظلمه ألقاك جنبى.. طب والنبى صُح ومش باكدب يا حراجى. وباحس معاك إن الدنيا لذيذة . "الرسالة الخامسة.. عن تفاصيله" وقوللى يا حراجى.. بتاكل كيف..؟ وبتلبس إيه؟ وبتقلع إيه؟ بتنام فين؟ قاعد فى المطرح مع مين؟ مين اللى بيغسلك توبك وبتتسبح فين..؟ "الرسالة السادسة.. عن مشاعره فى الغربة" قوللى يا حراجى بحق .. عامل كيف بس ف ليل الفرقه..؟ واللهى ما خش دماغى حاجه من اللى كاتبه فى الورقه .. ويا خوفى عليك .. بيقولوا فيه ناس.. ماتوا فى اللى اسمه السد .. طمنا عليك يا حراجى. "الرسالة السابعة عن استعداداتها لعودته" مش راح تاجى..؟ طالقالك فى البيت فروج .. علشان لما تعود م الأسوان دى.. تلاقى لك حتة لحم .. "الرسالة الثامنة.. عما تفعله خطاباته" يا حراجى.. جوابك بيرد الميه للزور الناشف ويبل . ده إحنا عايشين هنا ع السيره .. وزادنا الأخبار .. زوجتك فاطنه أحمد عبد الغفار جبلاية الفار "الرسالة التاسعة.. عن حبه" حراجى القط. يا أغلى من قشرة عينى وحيطان بيتى وولدى ربنا يتاقيلك فى عيالك وف مالك ولا يقفل قدامك سكه ولا يقطع لك مشوار جانى جوابك ما بتسألنيش ليه ع اللى بيجرى لما بتجينى الجوابات؟ كيف جسمى يسخن ويبرد وقلبى يرقص تحت التوب..؟ النسمة تهل عليا اول مايخش جوابك باعمل ولا كنه هاممنى قدام الناس أقلب واعدل فى ايدى الظرف. بعدين اتطلع للبسطاوى. وأقولله.. طب خش اقراه يتلموا عليا الحريمات. يقعدوا من جوه الباب مرزوق وسطيهم بالجوابات وأقول طب مش تستنوا لما مرزوق يشرب كباية الشاى ..؟ وأقيد النار وأعلق فوقها الميه وجوابك على حجري ان قمت أروح واخداه وان جيت أقعد على حيلى تاني أقوم تانى ف حجري حاطاه. وأسوى الشاى وانا سامعاهم ورا ضهرى بيتغاظوا.. وأصب الشاى وأقعد وسطيهم .. وأما أسلمهم واحد واحد كبايته أنا اللى أقص الظرف واديله الورقة بيدى عشان يقرا الله يسترها معاك ويخليك .. ويحبب خلقه فيك يارب. من يوم ما خدتنى يا حراجي وانت مكبرنى فى عين الناس. ومحسسنى انى ست البيت. الناس تتلم علينا وتقعد حوالينا كإننا عيلة. يا نفسى صُح يا ناس أحس انى ولو حتى لحضه قدرت أخفف يا حراجى عنك شيلة الشيلة. النبى جواباتك بتنور ضلمة مخى صُح وضلمة مخ الحريمات. كل ده يا حراجى جرالك فى أسوان؟ ده انت بقيت عفريت .. "الرسالة العاشرة.. عن حبها" وساعات لما أكون قاعدة لوحدى بانقى الغله ولا باعبى الجره أقول وحياة الرب حراجى حرام فيكى يا فاطنه. برضه كان لازمه بت أجدع منك .. مش يعنى تخن وطول حراجى عمره ما شافنى كده. حراجى . الكلمة ساعات تغنيه .. وتخليه ينعس ليلته مطمن رايق البال . وساعات برضه أقول : مانا برضه مليحة يعنى هيه الغيرى دي. برضه حتشيل فى عيونها اللى انا شايلاه لحراجى .؟ لَهْ. أنا أكتر واحده فى الدنيا تعز حراجى .. هو حراجى عاوز إيه م الدنيا .. غير ان الضحكة لما تطلع من قلبه تطلع مرتاحة .؟ وانا على كد ما باقدر .. بادعيلك . باكشف شعرى للنجم وبادعيلك يا حراجى .. وأقول .. ميتى حتاجى ..؟ وأشوفك بعنيا .. وانت بتخطى عتبة الدار .؟ زوجتك فاطنه احمد عبد الغفار جبلاية الفار
