ولسه بلادنا ولاده

ولا بتموت أراضيها
ومهما بتدبل الورده بيفضل عطرها فيها
ومهما يطول عليها الليل
بيجى النور يصحيها
ومهما يكون فى صوتها نشاذ
بيحلو الغنى فيها
ولو ضاقت علينا ساعات
بتفرج تانى بعديها
وتيجى القسوة من ناسها
تقوم حراسها تحميها
تعدى الأزمة والتانية
وبرده خيرها ماليها
وتبقى أرضها غابة
وترجع جنه بعديها
ويسكنها حدا وغربان
وينتهكوا حقوق الإنسان
وينسوا الحق والميزان
وتيجى الثورة تنقذها ومن تانى بتبنيها
ويشهد نيلها وتاريخها
على صدق الكلام فيها
ولو روحى تعيد مجدك
فى حجرك هاجى وارميها
واموت والبسمة فى شفايفى
ومين غيرك أموت فيها
ولسه بلادنا ولاده ولا بتموت أراضيها