عندما يتحول الإنسان لوحش بلا ضمير

اتكلمنا عن سلوكيات سلبية كتيرة لازم تختفى من حياتنا ومن بلدنا والنهارده هنتكلم عن أبشع سلوك ممكن نقابله فى حياتنا ونتعرض ليه ونعانى من بشاعته وهو (عدم الضمير) وأنا بقول أن لما ينعدم الضمير عند الإنسان بتنعدم الإنسانية فيه وبيتحول لوحش بلا ضمير وبلا رحمة، وتباح ليه كل المحظورات لأنه تخلى عن إنسانيته وإليكم بعض الأمثلة لناس انعدمت ضميرهم قصدى لوحوش باعوا إنسانيتهم مقابل الكسب السريع وغير المشروع، ونقدر نقول عليهم إنهم تجار فى أرواح الناس ولك أن تتخيل بشاعة الأمر لو تاجروا بأرواح أطفالنا.
ووصل الغش فى أدوية ولبن الأطفال واللعب فى تواريخ صلاحية لبن الأطفال.. ياعينك ياجبايرك.. قدرت إزاى تشطب تاريخ الصلاحية المنتهى من على علبه اللبن وتكتب تاريخ صلاحية جديد وانت عارف ومتأكد أنه غير صالح للاستعمال وتخيل رايح لمين.... رايح لأطفالنا يعنى روحنا ونور عيونا اللى بنتمناه من الدنيا وبنحلم نشوفهم احسن ناس وفى لحظة يتحول الحلم لكارثة.
ممكن أنت تضيع فيها لما تلاقى طفلك بيضيع بين إيديك وتحاول تعمل أقصى ما فى جهدك لإنقاذه وتتمنى تركب صاروخ مش عربية عشان توصل لأقرب مستشفى وكل دقيقة بتعدى عليك كأنها ساعات ويكاد قلبك بينخلع من كتر خوفك على حياة طفلك وتخيل فعلا لو انتهت حياة الطفل ده ودا معناه انك بتنهى على حياة والديه ويبقوا عايشين من غير روح وكل دا عشان إنسان قصدى وحش خطف منهم روحهم خطف فرحتهم وحول حياتهم لحزن وكأبه علشان يكسب شوية فلوس زياده.
أنت بتتسبب فى موت طفل بل موت أسرة بسبب الأدوية أو المحاليل الفاسدة ونبقى منتظرين شفاء أطفالنا ونتصدم بموتهم.
بقوله أنت مش بس بعت ضميرك أنت كمان بعت دينك واتخليت بكل بساطة عن تعاليم دينك وعن ربنا قصاد شوية فلوس وبقى كل همك جمع المال وبقى قلبك حجر بلا رحمه عشان كده ياريت وتمنى أن يكون عقابك برضو بلا رحمة وينال أقصى عقوبه ليكون عبره لكل من حاول أن يزور أو يغش ويتلاعب بأرواح أطفالنا واروحنا.
احنا كمان وفيه أمثلة كتير غير الغش فى الأدوية منها الغش فى المنتجات الغذائية وغش فى مستحضرات التجميل ولو هنتكلم عن كل حاجة لوحدها مش هنخلص كلام لكن بأختصار بنطالب كل فرد لو شاف أو عارف حد بيغش أو مكان بيتم فيه الغش نرجو الإبلاغ فوراً للشرطة المختصة بهذا الغش.
واحنا الحمد لله معانا مباحث تموين شايفه شغلها كويس جدا ودايما بتقوم بحملات ضد بؤر الغش وبيع المنتجات الفاسدة غير الصالحة للاستعمال لكن بمساعداتكم ليها سنقضى على الأكثر من هذه الفئات الذين تخلوا عن ضميرهم ونخلص بلدنا منهم ومن شرهم وكل المطلوب منك إشارة للادلال عليهم وأنك تقول الحق لأن (الساكت عن الحق شيطان أخرس).
اتكلم وقول لأن أنت المسؤول... مسؤول عن بلدك وعيلتك ماتسمحش لحد يستغلك ويغشك ولو فى يوم شفت وسكت هتكون أنت الضحية فالاحسن اتكلم وقول لأنك عن بلدك وعيلتك مسؤول، وفى النهاية دايما بقولك ابدأ بنفسك.