النصيب

دكّان جنب الدكّان والأرزاق ع الرحمن
بلاش يشغلك المكان وكمان سيبك م الزمان
المقسوم لك حتنولو
ولوعلا فى السما حتطولو
ربّك كريم ولُهْ دور
فى كل شيء مهما يقولوا
سارق قوتى ياناوى على موتى
ماهوش جُبْن منّى سكوتى
مش حاسامح على سحتوتى
ياللى جيت وبعت بيوتى
إنت وأعوانك حتزولوا
وفوق الأشواك حتجولوا
ماتقولشى بقى انا معذور
دورى العالمية بتعولو
كل شيء فى الكون نصيب
والساعة جايّة عن قريب
يموت القريب والغريب
وتزول جميع التخاريب
كل حال ولُهْ مدلولو
إللى اتعالى ونسى أصولو
تحت الثرى بكرا يغور
وناكر ونكير حيجولو
***