رواد تويتر يدشنون هاشتاج ساخر بعنوان "أشهر أكاذيب المرأة".. ويتداولون أبرزها: "أنا هخس من أول الشهر الجاى.. وهعيش معاك فى أوضة وصالة.. اتقدملى قبلك دكتور ومهندس وطيار.. وجالى عريس وأهلى بيضغطوا عليا"

"الستات ميعرفوش يكذبوا.. أنا هخس من أول الشهر الجاى.. لأ أنا مش غيرانة.. أنا هعيش معاك فى اوضة وصالة"، كل هذة العبارات وأكثر وصفها مستخدمو موقع التواصل الاجتماعى تويتر بأنها "أشهر كدبه تكدبها الست على الراجل"، بعد أن دشنوا هاشتاج يجمع كل العبارات التى تعود الرجل على سماعها من المرآة ولكنها تذهب كأنها لم تقال.
أشهر أكاذيب المرآة
وغرد مستخدمو تويتر بجمل شهيرة أو الأكاذيب الشهيرة التى دائما على لسان المرأة المصرية، عبر الهاشتاج، كان منها: " لأ أنا مش غيرانة.. مين البنت دى أصلا عشان أنا أغير منها، الستات مايعرفوش يكدبوا، أنا هخس من أول الشهر الجاى، ثوانى وأكون جاهزة، أنا هعيش معاك فى اوضة وصالة، تبقى هتموت من الغيظ وتقولك.. ولا ف دماغى هه، أنت أول وآخر حد فى حياتى، أنا اتقدملى قبلك دكتور ومهندس وطيار ومهاجم فى الزمالك، خمس دقايق هربط الطرحة ونزله، أنا هعملك أكل تأكل صوابعك وراه، ماما كانت بتشكر فيك وفى أهلك النهارده مع خالتى، الرجالة كلهم زاى بعض، أنا أخر حاجه تهمنى الفلوس، أنت أحسن حد فى الدنيا، انا عمرى ما كذبت عليك فى حياتى، أنا بحب الصراحة، ماتهمنيش الفلوس، سورى مبكلمش ولاد، إحنا مش هينفع نكمل مع بعض أنا اتخطبت، أنا مش بأكل كتير مش عارفه أنا بتخن إزاى، أنا شعرى ناعم حرير".
أكاذيب المرأة لإقناع زوجها بالتسوق
وشارك أحد المغردين بتغريده قال فيها أن أكثر ما يثير عصبيته هو" لما تسألها على حاجة عارفه مكانها بس ملهاش مزاج تقوم تجيبها تقولك معرفش"، وقال آخر إن أشهر كذبه فى رأيه عندما تقول المرأة: "أنا مكنتش ناوية اشترى حاجة بس لقيتهم عاملين سيل على الحاجات كلها 50%.. تحس كمان شوى هتشترى المحل بحيطانه".
وآخر يقوا أن أشهر كذبه هى عندما تقول المرآة: "الست تقول للراجل أنا مش قدرة امشى وأول مايجى وقت shopping. بتقلب كريستيانو رونالدو"، واعتبر آخر أن اشهر كذبه للزوجة عندما تقول "كنت قاعدة بكرامتى فى بيت أبويا.. وتلاقيهم بيحترموا منفضة السجاد أكتر منها ومصدقوا ارتاحوا منها أصلا"، وأخرى تقول: "أنا كنت هانم ومدلعة فى بيتنا وماليش فى شغل البيت قبل ما اتجوزك وهيا كانت بتاخد على أفاها من أخوها الصغير".
مواقف تعبر عن أكاذيب المرأة
وتابع المغردون بذكر مواقف لهم اعتبروها أشهر كذبة للمرآة حيث غردت أميرة، إحدى المشاركات فى الهاشتاج، قائلة: "ميهمنيش أصلاً ومش عاوزة أعرف الحوار.. وببقا هموت"، وقال مغرد آخر إن أشهر كذبه عندما تقول البنت "أنا جالى عريس وأهلى بيضغطوا عليا.. وهى جالها برد و محدش معبرها"، وقالت مغرد آخر أن أشهر كذبه يراها عندما تقول البنت "أنا جايلى عريس يوم السبت ومش عارفة أعمل إيه! "، وقال إيهاب رزق أن أشهر كذبه للمرآة عندما تقول فى بداية الزواج " هانعيش سوى لو هناكل طقة ونجوع طقة وبعد الجواز.. وهو داخل البيت.. ياما جاب الغراب لأمه".
وقال طارق الدمرداش، أحد المغردين، أن أشهر كذبة هى عندما تقول المرآة "آخر خروجه.. وبعدين تقولك عاوزين نخرج"، وقال محمد أن أشهر كذبه للمتزوجات هى: "تكون متزوجه ومعها أولاد ولما تروح فرح ترجع تقلك أن فى ناس اتكلموا عليا فكرونى لسة ما تزوجت".