عرفة الكنفانى.. اسم يعنى "المذاق" الكنافة بالمانجة مش هتنسيك "لقمة عرفة"

لو زهقت من الحلويات التقليدية، وجربت كل افتكاسات الكنافة سواء بالشيكولاتة أو المانجو ونفسك تحلى بحاجة حلوة ومختلفة ورخيصة، يبقى لازم تروح على عرفة فى السيدة زينب وتجرب الدونتس الشعبى أو لقمة عرفة زى ما بيتقال عليها.
لقمة عرفة عبارة عن دونتس معمولة بعجينة مختلفة وطريقة سحرية بتخليها لها طعم مختلف غير أى دونتس أكلتها فى حياتك، وعلى الرغم من بساطة تقديمها وعدم احتوائها على أى إضافات أو كريمات وافتكاسات مختلفة، فإن عجينتها الهشة الرقيقة اللى بتتقدملك سخنة وغرقانة بالعسل وبتفكرك بطعم المشبك والحلويات الشرقية الأصيلة بتخلى ليها طعم مختلف بيعيشك جوه جو مصر زمان.
روحنا بنفسنا نجرب لقمة عرفة بعد ما سمعنا عنها كتير، فلاقينا محل صغير مليان بالعمال الشباب اللى بيحبوا اللى بيعملوه وبيقدمولك طلبك بحب وابتسامة، وقدام المحل قاعد «عم عرفة» الرجل العجوز اللى وشه مليان طيبة، وعلى الرغم من كبر سنه فإنه بيصر يوميا إنه يروح بنفسه ويتابع الشغل بنفسه، اتكلمنا معاه عن تاريخ الكنافة فى مصر وأكد إنها موجودة منذ عام 1870 اختفت فترة ورجعت تانى وفضلت محتفظة بقيمتها على مدار السنين الماضية، باعتبارها أيقونة وأكلة شعبية لا غنى عنها فى أى بيت فى رمضان، اتكلمنا كمان مع «عم عرفة» عن فكرة لقمة عرفة واللى أكد إنهم أول ناس جابوا اختراع الدونتس مصر بشكله الشعبى، وأول محل جاب الماكينة اللى بتصنع الدونتس فى مصر وكانت بمثابة صورة كبيرة فى عالم الحلويات.
وبهرت جميع المحلات خاصة أنهم حافظوا على الطعم الأصيل والجودة والسعر الرخيص وفضلت «لقمة عرفة» محتفظة بقيمتها على الرغم من ظهور افتكاسات واختراعات كتيرة تانية زى الحلويات الغربية اللى بدأت تسيطر على عالم الحلويات دلوقتى، أسعار عرفة رخيصة نظرا لوجوده فى منطقة شعبية فى السيدة زينب، حيث تختلف أسعار الكنافة والقطايف كل عام بناءً على مدى أسعار مكوناتها، بينما يصل سعر لقمة عرفة الشهيرة إلى 2 جنيه فقط وهو السعر الذى يحاول المحل عدم رفعه نظرا للطلب الشديد عليها.