بالفيديو.."الحاجة أميرة" تعمل "مكوجية" منذ 30عاما: "أتحدى أى راجل يشتغل فى سرعتى "

"الست ممكن تشتغل أى حاجة وأتحدى أى راجل فى مسك المكواه "هكذا بدأت الحاجة أميرة فضل أو كما هى معروفة بين أهالى حى السيدة زينب بأم حسن المكوجية التى تبلغ من العمر 60 عام وتعمل بمهنة كى الملابس منذ 30 عام أثبتت خلالها إنه لا توجد مهنة حكر للرجال فقط وأن السيدات من الممكن أن يعملن بأى مهنة ويتفقون فيها أكثر من الرجال"
تروى الحاجة أم حسن قصتها لكاميرا"فيديو7 قناة اليوم السابع المصورة " قائلة :"أنا أسمى أميرة فضل ماشية فى الستين من القليوبية وعندى 4 أولاد جوزت منهم ثلاثة ولسه بعلم أبنى الصغير حسن هو دلوقتى فى ثالثة ثانوى سياحة وفنادق "
وتتابع :" جوزى توفى وهو شاب بعد ما أصيب بورم خبيث ففكرت إنى أدور على شغل عشان أعرف أعيش أنا وأولادى نزلت السيدة عشان أسكن جمب أهلى وبدأت أراقب بعينى مكوجى اللى جنبنا فاتعلمتها بعنيا وبدأت أشتغل مع مكوجى لكن لاقيت إنى مش باخد حقى ففتحت محل وبدأت أشتغل
فى البداية كانت الرجالة بتتريق عليا وكانوا بيبصولى ويضحكوا لكن انا ميأستش وحاولت أثبت لهم إنى الست تقدر تشتغل أى حاجة لحد ما الحتة بقت تدينى شغل وكل الناس هنا بتحترمنى وبتحبنى
فيه رجالة مكوجية كتير لكن مايقدروش يشتغلوا فى سرعتى وأتحداهم ونفسى أشترى أدوات تنظيف وحاجات كتير لكن إمكانياتى قليلة ,أنا بحب المهنة دى ومقدرش أخد إجازة منها وبشتغل من الساعة 8 الصبح لحد 12 أو 1 بليل وبنتى أتعلمتها برضه ونفسها تقف معايا فى المحل لكن أبنى فى البداية كان بيتكسف منى وكنت بقوله إنى مش بعمل حاجة وحشة وإنه يزيده شرف بشغلتى والمكواه دى اللى علمته وجعلته راجل فأتغير وأصبح دلوقتى مش بيتكسف منى وبقى يودى المكواه لأصحابه وبيقولى يزيدنى شرف إنك تكونى أمى وانا اللى مربيه عيال بنتى من المكواه برضه"
عن أمنيات أم حسن تقول "أنا نفسى فى حاجات كتير أوى نفسى مصر تبقى حلوة نفسى .. ربنا يوفق الرئيس عبد الفتاح السيسى ويسترها معاه دنيا وأخرة ونفسى ربنا يكرمنى وأطلع عمره تانى "