قلب شارع

قلبه شارع
من الشوارع
فيه بيوت وبلكونات
فيه شباب بيقفوا
ع الناصية وبالساعات
فيه حاجات
فيه حفر وبلاعات
و مطب صناعى للسيارات
فيه بنات وأمهات
ومحجبات وسافرات
وناس كتيره عايشه
ع اللى فات والذكريات
وناس شقيانة
مابتكسبش غير فتات
وشحاتين
وأصحاب العاهات
و ناس فقيرة كتير
و أولاد الذوات
الشارع طويل
متفرعة منه حارات
و الحارات مليانة
برضو ب حكايات
اللى فات منها ومات
واللى عايش سنين
طويله وبرضوا مات
واللى عمره أطول
من كل الحاجات
واللى قلبه لما يدق
تسمعه كل الساعات
واخد اسمه من الشوارع
و ملامحه من الحارات
عايش يدوبك ع الفتات
خوفه مليان بالسكات
لسه عيل!!
و عنده ياما ذكريات
ولا أمهات ولا أبهات
ولا راح مدارس ولا أتعلم لغات
ولا صنعة عنده
يعنى ضايع فى كل الحالات
و قلبه؟
قلبه مليان بالحفر والبلاعات