رغيف العيش

صبح غاية وكل الناس بتتمنا
ولجل تنولوا ويايا طابور ف طابور هتستنا
شهادة الجيش ويلزم فيش وكام صوره تجبهالنا
ونبقى نشوف قريبك مين عشان تاكله وتتهنا
وأصل اللقمة يابن الناس مهش بالسهل تلاقيها
ولازم تندعك تنداس عشان بسلامته حاميها
ولازم تشتغل بالفاس عشان يمكن يجود بيها
وتتشقلب قصاد الناس وتمسح جوخ لعاطيها
وايه ذنبى أجوع واتهان وأروح وامدح ف راعيها
وأبات وأصحى بهم القوت وأبارك مستبديها
وليه القسوة يابلدى وليكى روحى بفديها
تخلينى أخاف وأهرب وغيرك خيرى أديها
ف غربة ولدَت همى ونزلت دمعتى فيها
وأرضك هان لها دمى وبخلت باللى ف اديها
وليه الظلم يابن الناس بقى مكتوب على قوتك
وفى بلدك تطاطى الراس وصوتك يخرسو سكوتك
وقبل ماتتولد تلقاه بيستعجل قوام موتك
وأنا لا لى ف المجلس ولا الكرسى ولا الأحزاب
وكل منايا ياريس رغيف العيش يدق الباب
وعايزة حاف أنا راضى وهعملوا بقلبى حجاب
وهمسحها دموع أمى وأسود شعرها اللى شاب
تودعنى وأنا خارج بدعوة قلبها اللى طاب
وأروح اهتف ومش خايف من اللى عض قوتى وغاب
وخلى مصر ياريس ... بقت م الظلم تانى خراب
وعين الغدر ترصدنى وتتوعد بألف عقاب
وفى لحظة أنا عارف راح اطفى بس زى شهاب
وفركش كله راح يجرى ويتخفى ف حضن الباب
ويلمح وشى ف النشرة وجنبه ........يسقط الأرهاب