:أفندينيات

أفندى ، كلمة جاءت من اللغة اليونانية، ودخلت اللغة التركية منذ القرن الثالث عشر الميلادى، وهى تعنى: المالك أو السيد .
وبمناسبة أفندى ، يقال إن فاكهة المندرين ، سُميت : "يوسف افندى" ، نسبة للمهندس الزراعى "يوسف أفندى" ، الذى ادخلها إلى مصر فى عهد محمد على .
وأود أن أذكركم بأن عبقرى الكاريكاتير ألكسندر صاروخان ، هو من ابتكر شخصية المصرى أفندى .
أما أجمل ما قرأت عن أفندينا ، فهو للمدونة المصرية قطرات الندى ، التى تقول :
افندينا أنعم علينا بعلاوة
تجيب كيلو جبنة وعلبة حلاوة
أتارى العلاوة مجرد أتاوة
واحنا علينا الكلام اختلط
*****
عشان فى البداية حسبناها خير
وقلنا نواية حتسند يا زير
وحسنة حتمنع بلاوى كتير
وكنا حقيقى فى غاية العبط
*****
فى لحظة افتكرنا ان لينا حقوق
ونمنا وصحينا لقينا الخازوق
وقبل اما حتى يا عالم نفوق
لقينا اللى لسه حناخده اتشفط
*****
أفندينا يعنى فى لحظة تجلي
تعطف تلطف وقرر يخللي
مساحة الغلابة تزيد ستة مللي
وياكلو بدال التراب الزلط
*****
أفندينا أعلن صدور القرار
وقبل اما ينجح فى أى اختبار
فوجئنا بزفة ومولد وزار
قصايد جرايد برامج يفط
*****
تؤكد بأن الحكومة بذكاء
ومن حزمة واحدة قضت ع الغلاء
ولا بد يبقى لدينا انتماء
وناكل ونشرب ونلبس خطط
*****
عبال النمو اللى قالوا عليه
وحايشينه عنا منعرفش ليه
ما تلمح مكانا فى مرة عينيه
ونقدر ندوق منه حتى نقط
*****
مادام كل حاجة تمام ع الورق
مافيش أى داعى عشان القلق
ولو مش مصدق خلاص اتفلق
ورقنا اللى صح وكلامك غلط
*****
وقاللى مواطن عليم بالخبايا
أفندينا قرر تزيد الجباية
عشان شعبه جاحد قليل الرباية
بياكل وينكر زى القطط
*****
إذا الشعب صدى بفعل البارومة
حتعمل حسابه ف ايه الحكومة
وهى اللى جاهزة بكرباج وشومة
عشان لوفى واحد فى عقله اتخبط
*****
تعيش مصر دايما فى عز وجمال
يعيش المواطن شديد الاحتمال
وآمن تماما من الاشتعال
وأقصى ما عنده ينكت فقط
... ... ...