حلم العروبة باق

مين قال حلم العروبة مات؟
واندفن
من غير جنازة أو مُغسِّل أو كفن
مات والقطر فات
من سكوت
راح من غير رجوع
من غير دموع
حتى البكا ملهش صوت
حتى قبره كان سراب
لونه أسود كالغراب
حلم مات واتحلل
والدود منه بيتسلل
من سكات
كاره حتى الرفات
مش راضى ياكله من العفن
حلم العروبة اندفن
تحت التراب أصبح خراب
والأمل جوانا داب
كداب
حلم العروبة لسَّه شباب
مليان عزيمة
عمره ما يقبل هزيمة
أو غروب
عمره ما يعرف هروب
لسَّه باقى فى الشعوب
ريحته فايحة فى الدروب
حتى لو كان ضوءه خافت
مهما كان الوضع لافت
عمره ما غاب
أو طريقة منه تاهت
حتى لو كان لونه باهت
أو قالوا خاب
لسَّه حىّ
شمسه ضىّ
لو هتسأل راح يجاوب مين وأىْ
حلم ليه ماضى وتاريخ
عمره مايكبر يشيخ
مهما كان فى يوم جريح
أو حتى واقفة فى وشه ريح
شىء حقيقى شىء أكيد
ليه شروق تانى جديد
نوره يقيد
حتى لو كان يوم ضعيف
أو قالوا عايش فى الخريف
جذوره حديد بتتمد
مش ممكن فى يوم تتهد
والحلم جوانا عنيد
بكره جىّ
دا الأمل جوانا باقى
مصرى سورى أوعراقى
حلم الزمان
سعودى كمان
أو سودانى
هلبى لو واجب ندانى
نفس الجراح
بيهز وجدانى
لسّه الأمل ويانا براح
عمره ماراح
بكره جىّ
بشكل تانى مالهش زى
حلم العروبة لسّه حى
******