وطن

انا الحلم اللى مبيكملش
انا الامل اللى كل ما كانله ضى مبيوصلش
انا الثورة وانا الثائر انا المظلوم فى كل نظام انا الظالم
انا المكتوب على جبينى حلم
انا اللى كل كلامى مش مفهوم
انا المطحون فى لقمة عيشى انا المهموم
انا اللى بعيد عن الحسابات
انا اللى عمرى ما طمعت لا فى كرسى ولا فى سلطات
انا اللى برغم عشقى لبلادى لكنى غريب
انا اللى مهما بحلملك بتسرقى منى احلامى
انا اللى عشت مش فاهمك ومت وانتى مش فاهمانى
أنا اللى برغم أحلامى اللى مبتكملش
عمرى ما بطلت احلم ولا قلت يوم معرفش
أنا اللى برغم أوجاعى وأوجاعك قلت لأملى متوقفش
أنا المصرى أنا اللى مكتوبلى " وعجبي"
أنا اللى كل ما أجرى ورا شئ ألقاه مهوش طلبى
أنا اللى الدنيا وخدانى
أنا المألوم فى وجداني
أنا اللى كل ما يجى نظام ألاقيه خدانى وودانى ورجعنى مكان ما كنت من تانى
أنا المغلوب.. أنا المهروس فى أطماعكم
أنا اللى برغم طغيانكم مكمل وربى ربى حامينى
أنا اللى قلت زمان ولسه بقول يامصر إنتى ليكى عيني
أنا الوطن اللى حلمه عمره ما جه فى أحلامكم
أنا اللى أحلامى أبسط من كل أفلامكم
أنا الحلم اللى نفسه يكمل يوم لكنه مابيكملش