صافيناز.. المرأة التى دمرت مقياس ريختر.. «ليلة القبض على الراقصة الأرمينية».. المعجبون يتضامنون: اكتب على حيطة الزنزانة حبس صافى عار وخيانة.. هترحّلوا الصاروخ ليه؟.. الصاروخ خط أحمر

نقلا عن العدد اليومى :
تعمل فى صَمْت من أجل إسعاد الملايين، يعتبرها الكثيرون المُخَدِّر لآلام وأوجاع الحياة اليومية، مُحترفة، تتقن عملها بامتياز، يتابعها الصِغار والكِبار، نجمة الموسم، وكل موسم كمان، تَصَدَّر اسمها قائمة الأشخاص الأكثر بحثًا على «جوجل» خلال 2014 متقدمة على كل رجال السياسة، «بتقبض بالدقيقة»، بسببها ظهرت علامات «النفسنة» النسوية على مواقع التواصل الاجتماعى، وتفجّرت مواهب الشباب والرجال فى التغزّل وكتابة العبارات الرقيقة، وتسببت فى تصدّر كل فيلم شاركت فيه شباك التذاكر.. الليلة وكل ليلة، إنها «صاحبة السعادة»، «الزلزال»، المرأة «اللى هزت كل حاجة فى وقت واحد»، تحكمها فى العضلات عجيب وغريب، «أرمينية» الأصل، وشرقية «الصَنْعة».. إنها صافيناز.
هزّاز الموسم
امتلأت صفحات مواقع التواصل الاجتماعى، ب«القلشات»، و«الكوميكس»، الخاصة بصافيناز، يقول أحدهم: «الشُغلانة دى مش محتاجة شهادة، الشغلانة دى محتاجة ليونة»، ويقول آخر: «فعلًا.. بلد مافيهاش حد شغال بذمة وضمير غير صافيناز»، ويُحلل مُعجَب اسم الراقصة بكل وفاء وحُب (ص= صاروخ) (ا= أبيض) (ف= فتّاك) (ى= يشع) (ن= نووى) (ا= استِك) (ز= زلزال)، ومُعجب يعترف: «نفسى أترمى فى حُضنك وأعيّط»، و«يا تاعبة كل الناس»، و«يا صافيناز إحنا من غيرك.. زى الشارع من غير إنارة.. زى التقاطع من غير إشارة.. زى كوباية الشاى من غير سيجارة».
هترحّلوا الصاروخ ليه؟!
أصيب الشباب على مواقع التواصل الاجتماعى، بصدمة، بعد الإعلان عن زواج الراقصة صافيناز من مصرى صاحب شركة سياحة، بعد انتهاء فترة إقامتها فى مِصْر لعدم ملاحقتها، خاصة بعدما طالبت وزيرة القوى العاملة والهجرة، بترحيل الراقصة الأرمينية، قائلة إنها تعمل بدون ترخيص.
فبسبب زواج الراقصة، أطلق الشباب هاشتاج «رسالة للى اتجوز صافيناز»، وجّهوا فيه رسائل ل«المحظوظ» الذى فاز بها، يقول أحدهم «اعذرينى يوم زفافك.. ماقدرتش أفرح زيّهم»، وتزاحمت مواقع التواصل الاجتماعى بالتغريدات، والمنشورات، وصور «الكوميكس» المُوجّهة لصافيناز وزوجها، وكان أبرزها للرجل مثل «مش عارفين نفرح لك ولا نترحم عليك»، «بتخليها ترقص لك فى البيت ولا بتتفرج على كليباتها؟»، «إياك تزعلها.. دى وراها رجّالة»، و«المصرى الوحيد اللى هتلاقيه مبسوط دلوقتى هو اللى اتجوز صافيناز امبارح».
ورسمت ريشة الفنان محمد عبداللطيف، كاريكاتيرًا لشخص يوجّه كلامه للحكومة المصرية قائلًا: «تقطعوا الكهربا ماشى.. ترفعوا الأسعار وماله.. إنما تطردوا صافيناز لأه.. دى الحاجة الوحيدة اللى مصبرانا عليكم». فيما رسمت ريشة الفنانين أحمد خلف، وإيهاب عبدالجواد، رسومات كاريكاتيرية، تعليقًا على تجديد إقامة صافيناز بمجمع التحرير بعد انتهاء إقامتها بعد زواجها. كما نظّم المصريون وقفة احتجاجية تطالب بتجديد الإقامة للراقصة الأرمينية، رافعين لافتات «إدوها إقامة حُرة.. العيشة بقت مُرة»، و«منوّرة يا غالية»، و«I love You»، و«ماتقولش إيه إديتنا مصر.. قول هتقيم قد إيه فى مصر»، فيما بادر موظف مجمع التحرير بالقول: «ده إحنا نكتب لك إقامة على بياض»، وظهر فى الكاريكاتير ضابط شرطة يتحدث فى جهاز اللاسلكى قائلا:ً «الإقبال على المجمع النهارده تاريخى يا فندم».
وبعد إلقاء شرطة السياحة القبض على صافيناز بأحد فنادق مصر الجديدة، أثناء إحيائها إحدى الحفلات، واقتيادها لقسم شرطة النزهة، بعد أن قدم المحامى رأفت عدلى، مدير الفندق، بلاغًا ضد الراقصة الأرمينية، لخرقها تعاقدًا حصريًا تم بينها وبين الفندق، اشتعلت مواقع التواصل الاجتماعى بسبب الواقعة، وأطلق معجبو الراقصة هاشتاج «الحرية لصافيناز».
وتحت شعار «ثورة دى ولا اهتزاز»، قال أحد المعجبين: «الحاجة الوحيدة اللى جمعت المصريين الفترة دى خدوها مننا.. إحنا فداكى يا غالية»، وقال آخر: «يا نجيب حقها يا نتحبس جنبها»، وظهرت دعوات لتنظيم وقفة «اهتزازية» للتضامن مع الراقصة، ورسم مُستخدم آخر «جرافيتى» كان نصه «اعتقلونا وأفرجوا عنها.. تضامنًا مع صافيناز»، و«صافيناز مش إرهابية يا حكومة»، وتوسطت صورة صافيناز جملة «احبس كمان يا نظام جبان»، و«أختاه.. أخجلنا صمودك»، و«اكتب على حيطة الزنزانة.. حبس صافى عار وخيانة»، و«إنهم يقتلون فينا معنى السلمية، إنهم يقتلون فينا معنى الحياة.. فباعتقال الأخت صافيناز يجروننا إلى العنف.. فهى محاولات خبيثة لاستثارة غضب الشباب ولكننا مستمرون فى سلميتنا». و«سامع أم صافى بتنادى.. بنتى عندها نمرة الليلادى»، و«تعيشى.. يا مُزّة المساجين»، و«هاتو اخواتنا من الكباريه»، و«صافيناز يا ولد.. رقصك بيحرر بلد»، و«عزيزى الضابط اللى قبضت عليها: حرام عليك يا أخى ليه كده؟»، و«هتقبضوا على صافيناز.. هيطلع على المسرح مليون صافيناز»، و«الصاروخ خط أحمر»، و«الداخلية بتلعب فى هزّاز عمرها».