ما تزعلش

لو حد بيتكلم عليك من وراك وبيتمنالك الشر وبيستكتر عليك أنك تبقى مبسوطا ومرتاحا فى حياتك.
ما تزعلش لو اكتشفت أن حد بيشوه صورتك عند الناس اللى بيحبوك علشان يبعدهم عنك وتبقى عايش لوحدك.. ما تزعلش لو لقيت حد بيضحك فى وشك لما يشوفك وأول ما يسيبك يغتابك وينم عليك.
ما تزعلش لو حد عامل فيها حبيبك وبيقنعك أن هو بيخاف عليك وعايز مصلحتك وهو جواه كره وحقد ليك.
ما تزعلش لو عشت طول عمرك مخدوع فى الشخص ده وبتعامله بضمير وأنت أصلا مش فارق معاه.
ما تزعلش وماتحاولش تاخد منه حقك علشان ده شخص عمره ما هيتغير وكمان ما يستاهلش ما تزعلش وأوعى تفكر تعاتبه أو تلومه على أنه جرحك أو داس على كرامتك باللى عمله.
ما تزعلش لأن ممكن ييجى يوم وتتكشف حقيقته أودام الجميع وما يلقيش حد جانبه ما تزعلش لأن اللى خلقه شايفه وقادر أنه يحاسبه على ما فعله
طيب حتى لو زعلت أبقى فوض أمرك لربك علشان مفيش أحن منه.