أحمد رزق ل"صاحبة السعادة": "إسكندرية أحلى حاجة فى الدنيا"

فى حلقة خاصة من برنامج "صاحبة السعادة" للكاتبة إسعاد يونس عن مواليد محافظة الإسكندرية ملتقى الحضارات والتى أنجبت العديد من المواهب خاصة المواهب الفنية والأدبية، استضافت عددا من نجوم ومشاهير الإسكندرية، وقال الفنان السكندرى المولد أحمد رزق "إسكندرية أحلى حاجة فى الدنيا" وأنا مقصر فى حقها لكننى سأزورها قريبا لأنها أمى بكل معانى الأمومة ونزولى القاهرة كان حلما بالنسبة لى للالتحاق بالمعهد العالى للفنون المسرحية وقلت لوالدى" لو وعدتنى أدخل المعهد أوعدك سأنجح فى الثانوية العامة".
وأضاف رزق، والدى مخرج مسرحى سكندرى ومثلت معه وعندى 6 سنوات وكان يكتب على الأفيش الطفل المعجزة حمادة رزق وكنت بفرح جدا لما بشوف الأفيشات للمسرحية مكتوب عليها الطفل المعجزة وقال أول يوم ليا فى معهد المسرح اخترنى الأستاذ جلال الشرقاوى لمسرحية قصة الحى الغربى وكانت 1996، وأثنى رزق على تجربة أشرف عبد الباقى الجديدة قائلا "قلت لأشرف عبد الباقى شوف لى دور حلو معاك فى مسرحية من المسرحيات اللى بتعملها".
وتابع أن جمهور إسكندرية متذوق جيد للفن وده بيخلى الفرق المسرحية تعرض عروضها الأولى هناك، وقال رزق إن أول عمل عرف الجمهور به كان مسلسل الرجل الآخر مع الفنان الكبير نور الشريف ورشحنى للدور المخرج مجدى أبو عميرة.
وتحدث الكاتب الصحفى يسرى الفخرانى عن إسكندرية فى حلقة البرنامج قائلاً "أحلى حاجة فى إسكندرية إن كل مكان أروحه لازم أشوف البحر ومن كل الجهات وأن الإسكندرانى مبدع بطبعه فى كل المجالات المختلفة ومش لازم يكون فنان أو أديب ممكن يكون مبدع ولو فى "الطبخ" المهم إنه مميز.
وأضاف أن كل الحكام بكل أسف تعاملوا مع الإسكندرية على أنها مصيف ومجرد مدينة ساحلية وتابع الفخرانى أن محافظة الإسكندرية ظلمت مواهب كثيرة واضطروا للانتقال إلى القاهرة وأن على قهوة "تونى" اللى فى الشاطبى كان يجلس أعظم الكتاب للكتابة وتعرفت على الأستاذ أسامة أنور عكاشة عندما كان يكتب الجزء الأول من ليالى الحلمية فى شقة بالمعمورة.
وقال أحمد الكأس نجم مصر ولاعب المنتخب المصرى السابق لكرة القدم "انضميت للمنتخب وأنا لاعب فى النادى الأوليمبى وكان فى الدرجة الثانية ومكافأة وصولنا لكأس العالم فى 90 كانت عمرة لبيت الله الحرام".
وأضاف الكأس "إحنا زمان كنا بنلعب كورة للكورة لكن دلوقتى لكن دلوقتى المادة بقت طاغية أكتر على حب اللعبة" وأضاف أحمد الكاس عن كابتن محمود الجوهرى مدرب المنتخب المصرى الراحل أنه كان قوى الشخصية لكنه كان ابن نكتة".
وأكد "وحيد فريد" صاحب أشهر محلات الكبدة بالإسكندرية خلال استضافته فى الحلقة "جدى الفلاح الكبير هو الذى اخترع الكبدة الإسكندرانى وأطلق عليها اسم الفلاح لأنه جاء إلى الإسكندرية قادما من طنطا، وتابع عندنا 4 محلات باسم الفلاح فى إسكندرية ومش هينفع نفتح فى أماكن تانية لأنى بشتغل وبتابع الشغل بنفسى والنفس أهم حاجة فى الأكل و"الضمير هو اللى بيحلى الأكل فى بق الناس".