فى عيد الحب حبيبتى

قالوا: للحب نعمل عيد
يخلّد ذكرى حب سعيد
وحب مُحب لحبيبته
بقى يوم عيد
ياروح قلبى أنا بأهدى
ليكى ورده جميله حمره
بلون قلبى اللى غاب عنى
وراح وارتاح لعين سمره
وكام كلمه.. جميله حلوه
تشعلل فى الحشا.. جمره
ياساكنه جوار جبل عالى
يا مالكه فكرى وخيالى
ياما قلت عليكى مواويل
وكام غنوه بتحلى لى
وجا العيد
وكل حبيب.. مع حبيبته
وانا وحدى
يطول سهدى
ونجم بعيد
ضياه بيزيد
يواسينى على حالى
تعبت خلاص من الوحده
وقسوتها
قفلت أبوابى على روحى
وسكّتها
ومن حزنى أنا نسيتها
وقلت أعيش على ذكرى
جميله عمرى مانسيتها
لقيت قلبى زعل منى
وقاللى قوم وخاطبها
وغرد وانشد المواويل
وابعتها مع العصافير
حتلقى غُناك وصل بيتها
ويرجع لك ربيع قلبك
سنا من نور فى ضحكتها