مأساة الزوجة "رضا": أهلى باعونى لراجل صعيدى بالهدوم اللى عليا.. سافرت الصعيد معه بعد الزواج وكان بيعاشرنى بصورة مقرفة وحماتى ومراته عذبونى.. زوجى أجبرنى على العمل عشان يشرب مخدرات

"كبرت قبل أوانى ملحقتش أعيش طفولتى أهلى رمونى لواحد صعيدى عنده 38 سنة وأنا كنت بنت ال17 سنة مكنتش أعرف يعنى إيه جواز جه وكتب الكتاب وأخدنى بالهدوم اللى عليا مهو أصلى أنا اتبعت مش أتجوزت وسافرت معاه أسيوط بعيد عن أهلى وهناك شوفت الموت فى كل لحظة"، بهذه الكلمات بدأت "رضا" فى سرد مأساتها بعد أن أجبرها أهلها على الزواج ومنعها من التعليم.
وتابعت "رضا "روايتها ل"اليوم السابع"، قائلة: منذ أن فتحت عينى على الحياة رأيت العذاب ألوانًا فالبداية كانت يوم أن جاءت "الداية" إلى المنزل لتجرى لى الختان فيومها تمنيت الموت وتصورت أنها أصعب مرحلة فى حياتى ولكنى كنت حالمة لأنها كانت بداية الصعب فقط حاولت الهروب والصراخ ولكن أهلى منعونى والحجة عايزين "يربونى" خايفين منى لأحسن أجيب ليهم فضيحة.
وأكملت "رضا" فى حسرة وألم: "رفض أهلى أن أحصل على التعليم بسبب الظروف الصعبة والفقر الذى نحيا فيه وأجبرونى على العمل بأحد مصانع الملابس وبعد أن انتهى من دوام العمل أعود إلى البيت لأكمل وظيفتى فأنا "عبدة بدرجة إنسانة" إلى أن كبرت بالنسبة لأهلى وبدأت معالم النضوج تظهر على ووقتها كان عليهم أن يبحثوا عن من يدفع ثمنى ليرتاحوا من همى و"اللقمة اللى بأكلها".
وأكملت قصتها ببكاء وتأثر قائلة: "جاء العريس ولكنه كان صعيديًا ودفع لهم مبلغًا ماليًا وكتبوا لى الكتاب وأعطونى ليه ب"الهدوم اللى عليَّ" وخرجت من منزلى وأنا منهارة من كثرة البكاء فأنا سأترك البلد الذى قضيت به معظم حياتى وسأذهب مع شخص لا أعرفه كانت ضربات "قلبي" تسمع من على بعد إلى أن وصلنا إلى البيت وهناك كانت المفاجئة فزوجى متزوج قبلى استقبلت استقبالا حافلاً منها ومن حماتى إهانة وضرب وبعدها دخلت الغرفة المخصصة لى فى منزلهم المشترك مع باقى إخوته وقالوا له "يلا بقى عشان تطمننا" مفهمتش بس لما بيقينا لوحدنا عرفت معنى الكلام عاملنى بصورة مقرفة وكنت محرجة فأهله فى الصالة وأنا يحدث لى كذلك دون احترام لخصوصياتى"
وتابعت "رضا ": كنت طفلة تواجه الغربة دون أحد يحن عليها أعامل معاملة الحيوانات من حماتى وأهلى وأقعد باليومين من غير "أكل" كنت بضطر أخرج عندى الجيران وأنا ببكى من الجوع عشان أكل ولكنى لم أستطع الرجوع فأهلى رفضوا كل التوسلات التى أرسلتها مع من يذهب للقاهرة رغم الويل والغلب وصبرت حتى أنجبت 5 أولاد".
واستكملت "رضا" عندما كبرت ابنتى وأصبحت 7 سنوات فرض علينا الخروج للعمل عشان نصرف عليه فعملنا فى مصنع وهو قاعد فى البيت وأنا وابنتى شربين الغلب والمر، وهو ياخد الفلوس ويشرب بيها مخدرات وحشيش استحملت 18 سنة عشت عيشة "مرة قوى" ولكن الكيل فاض بى وهربت منه وتركت أسيوط ورجعت القاهرة لأعيش فى قريتى بعد أن جعلنى أتنازل عن كل ما أملك فى مقابل الحصول على أولادى.
وأنهت مأساتها "رضا": "الوضع صعب.. الإيجار غالى وعايشين فى أوضة بحمام مشترك والدنيا ملاينة عذاب ومحدش بيسأل على حد حاجة تقصر العمر والناس مبتسبش المطلقة فى حالها وبتتكلم".