"قلب الوطن".. جروب جديد يطالب بالعودة للزمن الجميل

على خلفية أحداث نجع حمادى الدامية..

استمراراً لظاهرة إنشاء الجروبات على الفيس بوك على خلفية أحداث "نجع حمادى" الدامية، التى أسفرت عن وفاة سبعة وإصابة تسعة آخرين، ظهر جروب جديد تحت عنوان "قلب الوطن"، لكن أعضاء الجروب هذه المرة دعوا لشىء مختلف، العودة إلى الزمن الجميل، قائلين: "عايزين نرجع للزمن الجميل اللى كان فيه جرجس مابيحسش أنه مضطهد لأنه مسيحى.. ولا محمد يحس أنه مراقب لأنه متدين.. الزمن الجميل.. كان محمد وجرجس عارفين إن اللى بيحصل ليهم سببه ظروف سياسية بيعانى منها كل المصريين مش متفصلة علشان تفرق ما بين مسلم ومسيحى.. الزمن الجميل.. الناس كانت بتحب فيها بعض لأنهم ولاد بلد واحد.. وكان الطبق الواحد بيدور على البيت الواحد يدوق منه الكل.. ناس بتحب بعض بجد مش بتمثل قدام الكاميرات وفى المناسبات.. ما لناش دعوة بالسياسة.. اللى يهمنا نرجع إيد واحدة.. مش كفاية نهنى بعض فى العيد أو نضحك قدام بعض علشان الصورة تطلع حلوة، وإحنا قلوبنا مش صافية".
وضع مؤسسو الجروب عدة خطوات يسيرون وفقاً لها، وهى "البداية يوصل عددنا ل 100 عضو ضرورى يكون منهم متخصصين فى "جرافيك – ترجمة – شعراء – ملحنين – إعلاميين - مشايخ – رجال دين ... إلخ"، محديين مبدأهم وفقاً لقاعدة أساسية هى "كلنا مصريين نحترم بعض مهتمين بالعلاقات الإنسانية الراقية بعيداً عن الحزبية والتعصب".
ثم حدد مؤسسو الجروب باقى خطواتهم ممثلة فى تحرك إيجابى بمخاطبة الإعلاميين والمثقفين والسياسيين ورجال الدين والمشايخ لكسب الدعم والتأييد، محددين رسالتهم للسياسيين "البلد بتتحرق كفاية تنظير ويلا نشتغل بإيدينا"، وإلى رجال الدين والمشايخ "زى ما فى مسلمين متشددين فى أقباط متعصبين، يلا نفكر بعض بصور التعايش الحقيقية اللى كانت بين المسلمين والمسيحين"، وإلى المصريين فى المهجر "اللى عايز يصلح حال البلد ييجى يشارك ولاد البلد".
أضاف مؤسسو الجروب: أن خطواتهم تتضمن إقامة احتفاليات جماهيرية فى حب مصر، وصولاً إلى إنشاء جمعية أهلية أو مجلس لإدارة الجروب، يتبعه دعوة رجال الأعمال لبذل المزيد من الجهد.
ولم ينسَ مؤسسو الجروب أن يضيفوا فى ختام رسالتهم "الخطوات ده كلها مجرد فكرة ممكن نضيف عليها أو نغير منها مش مهم مين حيعمل ده، المهم نتحرك ونلحق البلد قبل ما تتحرق مش لازم نفتكر شعارات الوحدة الوطنية وقت الأزمات بس فى مشاكل حقيقية محتاجين نواجهها ونفكر فى حلها بعقلانية".
جدير بالذكر أن هذا الجروب ليس الأول على خلفية أحداث نجع حمادى، فقد ظهر أكثر من جروب، منها "مسلمين.. مصريين.. بنرفض اللى حصل فى نجع حمادى.. وبنطالب الحكومة بحقهم" و"مستنين ردك يا رب هنصمت واتكلم أنت يا رب"، كما وصل عدد أعضاء الجروب إلى 153 عضواً حتى الآن.