قصيدتان جديدتان للشاعر محمد طلبة

إنسان "على مية بيضا"
أسامة
قبطان التكعيبة*
الأسمر
أبودم خفيف
العود
صبار ونحيف
والوش
كأنه رغيف
وخفيف ..
زى النسمة
فى عز الحر
طلباتك؟
ويقول القفشة المدروسة
ويفر
إنسان
من طين الأرض
خضار
طبعه:
زى الشاى البوسته
رايق، وبسكر بره
تاخد منه
على قد ما تقدر
ولا يخلصش
مع أنه حزين من جوه
وحسَّاس
وفقير فى الفرحة لنفسه
وكريم فى الفرحة
لكل الناس
إنسان ..
* مقهى المثقفين بوسط القاهرة
بهلوان
ماشى على الحبل
لا يمينك أمان
ولا شمالك رضا
ماشى على الحبل
لا فوقك
ولا تحتك
عيون تلصق على لحمك
وليل مطبوع على خوفك
خطاك نحتك
وفكرة نصها موتك
وباقيها ماهوش راحتك
***
العرق ..
عرف بطن الكفوف
واتفقوا على خطوتك
وأنت اللى عودك: وجودك
مصلوب على فرحتك
زاهد فى تفسير الملل
رغم التمرس!
شاهد على عفة عيونك
فى التحرش!
تابع لخطوة ضلك المحبوس
وأنت اللى فى جيوبك
مفاتيح البراءة المزمنة
ساكت ..
وأنت اللى مخلوق من غنا..!