لو حابب تكون مشهور

فى ناس تقولك لو حابب تكون مشهور وتطلع فى النور خليك عكس الناس عشان تلفت نظرهم وتعرف تظبطهم وتكون ابن ناس. ساعتها هتلاقى اللى يهتم بيك ويلاغيك حتى لو كنت هلاس.
وناس تقولك اوعى تاخد بكلامهم .. لو علوا صوتهم حاول تسكتهم وفى مكانهم سكنهم.. ويا سلام لو تعرف تفهمهم وتغير لهم وجهة نظرهم.
وناس تحب تتكلم على طول ومتسمعش.. قطر ماشى مبيقفش .. تقولك خليك بس معايا .. أنت فى حماية متخافش.. مسيرك فى يوم هتوصل متقلقش.. سيبنى بس أقودك ومتسألش.. وادى الخريطة عشان متوهش.
وناس تقولك هكلملك فلان وعلان عشان يوصلك فوق للعنان وترتاح بقى فى حياتك وتوصل على قفا الغلبان .
وناس تزعقلك وترهبك وتقلبلك وشها.. مجرد بس تطلع غلها .. حتى لو على عصفورة صغيورة لسه خارجة من عشها.
وناس ولاد ناس تقولك تعالى خد فرصتك.. أنا هكون واسطتك .. توهمك أنها حبتك لأ وكمان عشقتك.. فضل سهرانة تكلمك ويا عينى تعشمك.. عايزة توقعك وفى حبها تغرقك.. مزاجها يا سيدى توجعك.. شبعانة وحابة تجوعك.
وناس تدوس على قلبك وبعدين تقولك هو أنا جيت جنبك.. مش ذنبى إنى عجبتك ده أنت اللى وهمت نفسك وافتكرتنى خدعتك.
وناس تقولك خليك مبادر وبسيط توصل لقلوب الناس بالعبيط .
وناس تانية جميلة.. لساها أصيلة.. تقولك توكل على الله.. أكيد طبعا ونعم بالله.. اسعى يا بنى واصبر تنول، وذاكر أنت بس.. هتوصل على طول .
وناس تقول وناس تقول.
وأنت شايف وعارف من غير ما حد يقول إن غير رزقك لن تنول.
لأنك لو وصلت هتلاقى ناس كتير بيسمعوك
ولما تتكعبل ومش بعيد تتبهدل هتلاقيهم بيسيبوك،
ويتكلموا عليك ويهينوك ومش بعيد يسبوك
وأنت عشان طيب وأهلك عرفوا يربوك.
لسه بتحلم بناس حلوة بطيبتهم يزودوك وعارفين قيمتك وفاهمينك وفى بحر حنانهم بيغرقوك وتلاقيهم دايما جنبك حواليك بيضحكوك.
الناس دول موجودين .. جنبك قريبين.. فيهم الخير ماليهم .. شبعانين.
دور عليهم هتلاقيهم.. لو غبت شايفينك ادام عنيهم
بيندهوك ويطمنوك بكل شوق وحنين.