حقوق اليتيم

طفل بيصرخ وحده يتيم
وضعى حقيقى بجد أليم
نفسى ألاقى صدر حنان
نفسى ألاقى قلب رحيم
**
نايم صاحى بجوع موجوع
صبح وليل على خدى دموع
بعد أبويا وأمى ما ماتوا
طفيت فى حياتى كل شموع
**
عايز إيد تساعدنى أقوم
عريان عايز دفا وهدوم
لمَّا سقيع البرد بيجى
أبكى يا ريت الحر يدوم
***
أغلى الناس ماتوا وسابونى .. وبقيت من كل أمان محروم
أشكى همى يا أمى تضمى .. وبابا يدينى اللقمة يصوم
أنا محتاج لنظرة عطف .. من إنسان يشاركنى هموم
***
كان الأمل معاى ممتد .. راح الحلم حقيقى اتهد
وكل مابرجع أحلم تانى .. ألاقى طريق الحلم اتسد
ماتوا أغلى حبايبى ياناس .. وملانى الحزن حقيقى بجد
****
بتعذب لمَّا ألاقى رغيف .. أنا وإخواتى بيتنا رصيف
محتار أنا مش لاقى نصيحة .. يتيم وماشى لوحده كفيف
***
كنت بروح مدرستى وشاطر .. واخد البوسة وطالع فاطر
بعد الحضن الدافى ما مات .. بقيت مهموم مكسور الخاطر
**
مجتمعى لكل حقوقى ناسى .. والكل عليَّا قلبه قاسى
أيوا يتيم وشىء مش ذنبى .. كل الدنيا شايفها مآسى
**
عصفور ماشى بجرح حزين .. وبيبكى ماحد سامعله أنين
برىء وبيشكى من الحرمان .. نفسى ألاقى قلب حنين
**
ماشى فى دنيا لوحدى شريد .. وكل ما بكبر همى يزيد
بعد أبويا وأمى ماماتوا .. كل الناس قلوبها حديد
محتاج رحمة حقيقى يا ناس .. أنامش عايز حفلة وعيد
لمَّا أهل الخير تكفلنى .. هبقى زى أصحابى سعيد