الزوج المخلوع"عصام"من أمام محكمة الأسرة ل"اليوم السابع":الزن على الودان أمرّ من السحر..وبعد حُب 4 سنين قبل الزواج و7 سنين ربنا رزقنا بأجمل طفلين..حماتى البومة خربت بيتى وأقنعت بنتها ترفع ضدى دعوى خلع

"الزن على الودان أمر من السحر، حماتى خربت بيتى من كتر زنها على مراتى وخلتنى أتجنن معاهم والله العظيم، حاولت بكل الطرق إنى أرضيها ولكنى فشلت، ونصيحة لكل الرجالة مفيش أحسن من المعاملة الحسنة مع الزوجة، علشان ميقفوش فى نفس مكانى ده ويتخلعوا من زوجاتهم"، بهذه الكلمات بدأ الزوج المخلوع "عصام" حديثه ل"اليوم السابع" من أمام محكمة الأسرة بإمبابة أثناء نظر دعوى الخلع التى أقامتها ضده زوجته.
وأضاف وهو متأثراً من النهاية المأساوية لحياته الزوجية قائلاً: "حبيت مراتى 4 سنين قبل الزواج وعشنا بعدها 7 سنوات رزقنا ربنا فيهم بأجمل طفلين، ولكن القدر لم يتركنا فى حالنا وخصوصا فى وجود امراة مفترية ذى حماتى".
وتابع عصام سرد قصته مع حماته التى دمرت حياته وبيت ابنتها، قائلاً: "تدخلت حماتى بصورة بشعة فى كل كبيرة وصغيرة فى حياتنا، ووصل بها الأمر إلى أنها طردتنى من شقتى، وأقامت مع ابنتها وأطفالى فيها، ورغم محاولتى الحثيثة لكى أعاملها بصورة أفضل مثل والدتى اللى اتحرمت منها وأنا طفل، لكنها كانت ست صعبة جداً مع بنتها، وقدرت تسيطر عليها وتقنعها إنها تقدم دعوى خُلع لى أمام محكمة الأسرة".
وأكمل "عصام" الزوج المخلوع قصته: "حماتى الكذابة ادعت أننى أقوم بالتعدى على ابنتها بالسب والضرب أكثر من مرة، ولا أنفق عليها لأنى بخيل، ولكنى لن أكذب ولقد قمت بالفعل بضربها أول أيام زواجنا وكانت مرة واحدة، والسبب فيها إننا لسه متعودناش على طباع بعض، وخرجت ساعتها عن شعورى فمقتدرش أمسك نفسى وضربتها، بس والله ما اتكررت طول السبع سنين تانى، ولا عمرى مديت إيدى عليها بعد كده".
واستطرد "عصام" قصته قائلا: "لى أكثر من شهرين ونصف محروم من رؤية أولادى، وعلى فكرة "أنا معنديش أزمة إنى أطلق أو أتخلع، كده كده البيت خربته البومة أم مراتى، وللأسف أنا مش عارف لغاية دلوقتى ايه المعادلة الصعبة بين الزوج والحمى أنا عانيت ومش عارف ليها حل".
وفى نهاية حديث الزوج المخلوع "عصام" قال: "أنا ممكن أرجع لمراتى فى حالة واحدة وأتغاضى عن قضية الخلع بأكملها كانها لم تحدث، بس شرطى الوحيد إنى آخدها وعيالى ونبعد عن كل وش أمها البومة دى للأبد، وأخيرا انصح كل الرجالة علشان ميتخلعوش بكلمتين فقط وهما - المعاملة الحسنة – وبما يرضى الله".