خليك يا مصرى عزيز

لو يشتروك بالماس .. إياك توطى الراس
لو جابو سيرة الغيط أو حتى سيرة الفاس
إياك تكون مكسوف .. دول هما الأساس
المصرى دايما حر لو حتى كان كناس
يشقى يدوق المر عنده حيا وإحساس
خليك يا مصرى عزيز .. خليك أعز الناس
خليك يا مصرى عزيز خليك أعز الناس
لازم تكون قادر وقت اللزوم حاضر
واضغط على نفسك وانجز وقول حاضر
دايما صاين اسمك غايب لكن حاضر
مصر .. بلدك كبيرة .. لازم تكون زيها
شيلاك لوقت حاجة .. ولازم تكون قدها
وخلى مصر فى قلبك وغنى بحبها
ولو زعلت منها
اجرى على ضلها
اركع على أرضها
إدارا فى حضنها
اشكيلها وقولها
خفى عليا الحمول أنا ضهرى منها انقطم
وابنى يوم الولادة من شدة الفقر اتفطم
وخدى يوماتى وارمى من الهموم من كتر ما اتلطم
لفتها شبر شبر من غربها للشرق
لجل حياة كريمة زى بقيت الخلق
نهارى فيها ليل .. وليلى كله برق
صايبنى فى جسمى وسايب فيا حرق
خلو دايما فيه أمل .. ربكم اسمه العدل
خلوا قلوبكم نضيفة من غير خداع أو غدر
هتلاقوا ليلة سوادها حالك وليالى فيها بدر