بالصور.. مهندس مصرى يصمم إكسسوارات للمنزل ينافس بها المستوردة

من هندسة الكهرباء إلى عالم الديكور والإكسسوارات، رحلة شريف طاهر الشاب العشرينى اليومية.
جلسة بسيطة فى منزل أحد أصدقائه اكتشف فيها أن أبسط إكسسوارات وديكورات المنازل نقوم باستيرادها من أوروبا وشرق آسيا بأغلى الأسعار، ليقرر أن يحول جزءا من حياته إلى تصميم إكسسوارات منازل مصرية 100%.
"Pieces for home accessories" هذا هو الاسم الذى أطلقه شريف على مشروعه لصناعة إكسسوارات المنازل، ليحاول مواجهة طوفان إكسسوارات المنازل المستوردة، ويقول شريف "الإكسسوارات اللى زى الخداديات والمفارش اللى المفروض تكون أسعارها بسيطة، مع الأسف مش موجودة إلا بأسعار مرتفعة بسبب إن كلها مستوردة، وبعد بحث طويل اكتشفت أن تصنيعها سهل بس محتاج ذوق عالى، وبحث عن أحدث التصميمات، وده اللى بدأنا نشتغل عليه".
ويتابع شريف "إكسسوارات الديكور هى قطع بسيطة لكن ممكن تغير شكل الديكور وكأنه جديد، يعنى ممكن بمجموعة إكسسوار تتغير كل سبعة أشهر تحول شكل البيت، لكن ارتفاع أسعار القطع البسيطة دية هى المشكلة اللى بتقف قدام الناس، إضافة إلى أن الإكسسوارات الأجنبية مش متناسقة مع ثقافتنا المصرية، وتفاصيلها الجميلة اللى ممكن تخلينا نصدر فى يوم من الأيام".
شريف يقسم نصف يومه ما بين العمل كمهندس، والنصف الآخر إلى البحث عن أحدث الخامات والتصميمات، والوقوف فى المشاغل لتجهيز منتجاته الجديدة التى من المقرر أن تطور خلال الأشهر المقبلة، لتضاف لها طاولات الشاى وقطع من الإكسسوار التكميلى.