صرخة طفل

شنطة كتب دى فوق كتافى
واللا ذنوب ماعملتهاش
أنا بريء وذهنى صافى
والدنيا لسه ماشفتهاش
مكتوب لى ليه أشيل الحمول
وعمرى لسه ما ابتداش
وعودى لسه شكله أخضر
والعود ضعيف ولا استواش
مش شكوتى كتر الكتب
العلم أصله مش ببلاش
العلم نور وكمان ده قيمة
من غيره أحنا ما نسواش
والعلم ده إرادة وعزيمة
ياريت بأه ماتموتوهاش
ونعيش فى أفكارنا القديمة
ونحفظ حاجات مافهمنهاش
لما العقول تكون سليمة
الجهل عمره ما يدخلهاش
وعقولنا دى نعمة عظيمة
علموها ما تحشوهاش