وقف الحرس..

وسط الميدان وقف الحرس
شفت فعينيهم ميت سؤال
إيه اللى فاضل فى البلد غير العيال وأم العيال؟
حتى الجاموسة بعتها والأرض بارت كلها
عشرين قيراط.. فتتها مابقتش جايبة همّها
بعت لعمامى وكل خال
إيه اللى فاضل فى البلد غير العيال وأم العيال؟
والوقفة دى لازمتها إيه؟..
والناس دى بتهلفط بإيه؟
دستور وورث وحكم فاسد.. يعنى إيه؟
هى البلد مش ليها صاحب والا إيه؟
مين اللى يستجرى يقول للعمدة بم؟
شيخ الغفر كان أدّبه
والواد عويضة توّبه
واتعلّق الواد ع الفلق طول النهار
والشمس تهرى جثته والجو نار
لكن الرواية فى الميدان اتشقلبت
إحنا الحرس! وإحنا اللى واقفين نتشوى
وإحنا اللى لو خرب الميدان راح نستوى
البيه أبو نجوم مش حيرضيه غير كده
قاعد بيشرب شاى هنا فى الضل ده
ملعون أبو اليوم اللى رحت لبست فيه اللبس ده
والعصى فإديا ملاه الدم.. جاتكو الغم
البيه أبو نجوم لو يقول نضرب نكسّر عضمهم
ناقصين رباية يبقى خلّى الحبس تانى يلمّهم
طيب ونضرب برضه فى النساوين يا بيه؟
والحرقة والدم اللى نافر من عروقهم بس ليه؟
معقولة يبقى الحق ويّاهم؟ يا واد بطّل عبط
للبيه أبو نجوم يضبطك
ويعلّقك ويمرمطك
علشان تبطّل فكر لتكون زيّهم
ده انا كل ليلة بقول يا رب ماكنش واحد منّهم
أو يحسبونى حتى واحد منّهم
طب اسيب لمين بس العيال؟ وأم العيال؟
ده ماعدش فاضل فى البلد غير العيال وأم العيال