على فكرة

عادى إنك تكون سعيد باللى حصل يوم 30 يونيو عندما نزل ملايين البشر سلميا تطالب النظام بالرحيل.. وكمان تعطيه فرصة الخروج بشكل ديمقراطى لائق (استفتاء شعبى أو انتخابات مبكرة).. ما تخليش حد ينكد عليك أو يزور التاريخ ده وبحملك مسئولية الأحداث المؤسفة اللى حصلت بعد كدة.
تخوفك من عودة الدولة البوليسية والقمع السياسى أمرا متفهما خصوصا إذا كنت قررت تنضم لعالم السياسة والعمل العام بعد ثورة يناير.. بس ده برده مش عشان إنت قررت تشيل نظام ضعيف فشل فى فهم وفك أكواد الدولة المصرية..لأ ده نتيجة اقتتال واضح بين نظام حكم سنة ونظام كان بيحكم 30 سنة على كرسى السلطة.. طرف فيهم عارف أنه لو خسر حيخش السجن والطرف أبو 30 سنة ما لقاش حد يلمه بعد مهرجان البراءة للجميع اللى كان شغال، فطمع وقال لك طب ما الحق لى جزء من الكعكة.. دورك بقى وحربك الجاية تكون ضمان إن اللى فات ما يرجعش وبطل تقعد تندب وتلعن فى الإخوان أنهم السبب. الموضوع كان أكبر منهم بكتير وده كان واضح.. أهم مشيوا..شيل بقى يا زعيم.
عادى إنك تبقى حزين ومكتئب على ضحايا الإخوان اللى كانوا عرضة لعنف مفرط من الشرطة أو البلطجية أو الأهالى.. هتلاقى واحد منهم يحملك السبب عشان نزولك يوم 30!. وكأن ضرب المتظاهرين وقتلهم وسحلهم أمر ما كانش بيحصل أيام حكم جماعة الإخوان والمجلس العسكري!!.
هيحاول بكل قوة أنه ينزع منك مبادئك الإنسانية، زى ما كان زمان بينزع منك قيمك الإيمانية، هيقولك إنت تشمت فى الموت يا فاجر!.
بص كدة كويس هل إنت فعلا شمتان فى الموت؟!. لو الإجابة لا.. يبقى ابتسم وعديها.. راعى أنه مرتبط عاطفيا بالناس اللى ماتت وقضيتهم.. وإنت مرتبط إنسانيا وأخلاقيا بس بالناس اللى ماتت ومش مقتنع بقضيتهم.
هترتاح أوى لو قدرت تنفصل عاطفيا عن الأحداث وتضع الأمور فى نصابها وتسميها بمسمياتها.. الإخوان فى حالة ثورة مش فى حالة مظاهرة سلمية.. وده أمر متفهم لناس شايفة أنهم ما خادوش فرصتهم وإن الشعب ومؤسسات الدولة انقلبت عليهم.. المظاهرة السلمية معلومة المكان والزمان والأهداف وسيناريوهات النهاية (وده غالبا عمره ما حصل فى مصر).. هتلاقى نفسك تايه بين مشاهد الحرب على الإسلام بفيديوهات مدنيين بتحاول تقتحم مسجد.. وفيديوهات تشوه الإسلام تعرض مجموعة من الإخوان بتعذب محتجزين.. لو كانت دى حرب أهليه كما يزعمون يبقى اللى كان بيحصل عند الاتحادية حرب أهليه برده.. فالأهل فى كلمة أهلية مش المقصود بيها الأهل والعشيرة بس.
لو شايف إن خطاب السيسى بتاع التفويض تحريضى وهو السبب.. يبقى خطاب مرسى بتاع الحارة المزنوقة "وسوف أفعلها" واتقوا شر الحليم واضرب يا ريس بيد من حديد خطابات تحريضية..
الحقيقة أن خطاب السيسى كان رسالة إلى الغرب اللى الإخوان بتطلب تدخله لتوضيح رأى الأغلبية (استعراض عددى أنا مش موافق عليه.. لأنى مؤمن أنها مش بالعدد) وخطابات مرسى كانت مناورات سياسية تهديدية صعب أنك تحمله الدماء اللى سالت بعدها.
للتاريخ.. كل الحذرين والمتخوفين والمتشائمين انتظروا اقتحام الجيش لاعتصام رابعة بعد التفويض.. ولما ده ما حصلش لقينا الناس بتموت فى مكان تانى خالص على بعد 3 كيلو من الاعتصام.. غالبا حركهم الخوف من موقعة جمل جديدة.. فقاموا بإجراءات احترازية وده مجرد ظن ولكن يظل السبب الحقيقى فى التحرك من رابعة فى اتجاه كوبرى أكتوبر فى يوم حاشد زى ده مجهول ويفتقد كثير من الحكمة مش بس السياسية لا كمان الثورية!.
وبغض النظر عن الأسباب يظل الحادث مؤلم.. والعدد مرعب ويتفرق دمهم بين القبائل! جيش وشرطة وبلطجية وأهالى..
حتلاقى نفسك تايه بين فيديوهات جديدة للشرطة بتضرب فى الملتحين وفيديوهات قديمة لملتحين محميين من الشرطة وبيضربوا فى المعارضين.. أفصل نفسك عن المشاهد دى كلها.. عشان سلامة قلبك وعقلك.. وقيم المشهد لوحده.. احنا أمام جهاز شرطة غير محترف يستعين بمدنيين لضرب مدنيين تانين.
أنا رافض نظرية المؤامرة لأنى شايف إننا شعب مش مبدع.. عشوائى.. ورافض الانفصال عن القضية الفلسطينية والسورية وكأن الرابط بينا وبينهم جماعة الإخوان.. دعم فلسطين بالغاز والسولار واجب وطنى لو لسه مؤمنين بفنكوش أم الدنيا وما شربتش من نيلها وكدة.
ممكن تبقى كل اللى فوق ده ولسه مؤمن مصلى وصيامك مقبول وكدة ونصيحة أكتب وحرر الأفكار اللى جواك.. تزوير التاريخ أمر عادى وبيحصل فالتاريخ يكتبه المنتصر.. ولكن الخطورة فى تزوير الوعى والإدراك وتتحول إلى المغنى اللى أنا مش عارف اسمه "أنا مش عارفنى أنا تهت منى".. اللى هيؤدى لانهزامية تتوارثها الأجيال عن طريق قصص قبل النوم.
عضو مؤسس فى حركة سلفيو كوستا