بالفيديو.. شاب سلفى لمرسى: "أنا كافر بيك يا تديرها يا تسيبها وتمشى"

انتقد الشاعر السلفى علاء محمود، الدكتور محمد مرسى، رئيس الجمهورية، نظرا لما تشهده البلاد من أحوال سيئة فى ظل حكم الإخوان، من استمرار قطع الكهرباء وانتشار البطالة وسط الشباب وتجاهل قضية الضباط الملتحين وانتشار الفكر الشيعى فى مصر، واختتم القصيدة بقوله "ياريس مرسى أنا كافر بيك يا تديرها يا تسيبها وتمشى الله يخليك".
جاء ذلك خلال قصيدة له بعنوان "إيه رأيك" ألقاها أثناء استضافته على قناة الرحمة، فى وجود الداعية الإسلامى الشيخ محمود المصرى.
و جاء نص القصيدة كالآتى:
"إيه رأيك لو مرة قالولك وطنك أرضك بلدك عرضك كله مافيش
دور فى جيوب الناس على وطنك مش هتلاقى غير قرش حشيش
واحد سكران و التانى عطلان هيقولك فكك منى وسبنى أعيش
و لا تشغل بالى بشعب ولا بحكومة ولا حتى الجيش
بشرب من همى دا أنا مش لاقى رغيف العيش
بكيت سنين جسمى اتهرى من لبس الخيش
طول عمرى قايل كلمة حق لكن بلدى ما سمعتنيش
و العيب مش فيها العيب فى النظام كسر عظام
منع الكلام قال دا حرام ولا أنت كافر ما بتصليش
قتلوا الإرادة سلبوا السعادة والدنيا بيهم صبحت ما تساويش
وكتير بصبر نفسى لجل إن أعيش و كل ما أقول أزمة و هتمر
أرجع من تانى و أدوق المر
أنا هعمل ثورة جديد من تانى علشان اللى فاتت مش عجبانى
بعد الشعب ما ثار وخطى فى وسط النار وشال حكومة العار وبقت الكرامة خلاص عنوانه وعنوانى
وشلنا كمان صاحب الوسية أصل العيشة ما كنتشى اللى هيا
وقافانا كان وارم من ضرب الداخلية
وشلنا العسكر أبو قلب أبيض زى الفل
اللى مسك البلد وطلع لسانه وضحك على الكل
عايشنا فى نوم وثبات وقال اللى جى أحلى من اللى فات
ومشينا وراه لحد الانتخابات
وصرخنا بعلو الصوت الحيانى شلنا مبارك وجبنا رئيس إخوانى
قال أنا هحكم بكتاب الله ياه يا ما أنت كريم يا الله
أخيرا الشرع يا ناس هيسود و الحق هيرجع تانى ويعود
وهنبقى شوكة فى حلق يهود وهيرجع تانى صلاح الدين
هنحارب من تانى بجيش حطين وهناخذ الأقصى من الملاعين
وبعد ما كانت الشمس هتسطع بقى كل يوم النور يقطع
إخواتى بيموتوا فى كل مكان والدم سال غرق كل ميدان
ورئيسنا مصهين ولا على باله
ريسنا مصهين و لا على باله أبو دم خفيف إيه اللى جراله
بلدنا سابت مالهاش رابط كان نفسى ينصر لحية ضابط
فين الشرع ياريس قول شمت فينا العدو والفلول
والشيعة ياريس دول مش شرع دول خلفونا فى أصل وفرع
سبوا الصحابة فى كل أدان مش بس دا حرفوا فى القرآن
سبوا حبيبة خير الناس وأنت شايلهم فوق الراس
ولا بتحلم تنهض بيهم وتبقى فلوسهم لينا وليهم
يا راجل أصحى و قوم من النوم بلدك غرقانه فى بحر هموم
ياريس مرسى أنا كافر بيك يا تديرها يا تسيبها و تمشى الله يخليك"