براءة موقعة الجمل

طلع مفيش فيه جمل ولا حتى فيه ثوار!
بيقولوا أصل القضية كان ناقصها حمار
والنائب العام طلع نائب عموم مغشوش
والقاضى حسب الورق مقدرش يدى قرار
...
و(مرسى) كان قال زمان للناس أنا المسئول
هجيب حقوق الولاد الحى والمقتول
وحلف بأمه وأبوه ما هو سايب القاتلين
وهيدبح اتخن جمل و(مرسى) قد القول
...
وحلف كمان بالرخاء يعم كل مكان
وكل مطرح يقولوا إن فيه إخوان
من غزة راح يبتدى وهينتهى بمطروح
و(مرسى) قد القسم والوعد والحلفان
...
والحكم أكد كمان مكنش فيه ثورة
ولا اقتحام للميدان بجِمال ولا هِرة
والحُكم أكد كمان أن مفيش خرطوش
ولا قنابل دخان شوفناها بالمرة
...
طبعا كمان حضرتك مكنش فيه شهداء!
متقولش عندك ورق ولا كشف بالأسماء
ولا تقول فيه صور فى وسائل الإعلام
علشان رجال الصحافة كلهم أعداء
...
الحُكم أثبت كمان أن الشهيد محقوق
لازم يروح للجِمال ويعتذر بالذوق
أما الحمار والحصان راح يصرفوا تعويض
وكُل والد شهيد راح يصرفوله خازوق
...