رباعيات

الكريم طول عمره كريم
ما يرد من وقف على بابه
أما الندل دايما لئيم
وعتاب الندل اجتنابه .
إللى يعرف الدنيا على حقيقتها
عمره فى يوم ما هيبكى عليها
غداره وحذارى من ضحكتها
الكل مفارقها مهما عاش فيها .
أنا إللى ماليش حظ وديما كده منحوس
ولو جانى الحظ مرة بيجينى بالمعكوس
ألاقى نفسى إتوكست أكتر ما أنا موكوس
الحظ مش بس مال مش كل حاجة فلوس.
أنا إللى الفقر كان ليا أعز صديق
كل ما أروح فى مكان يسبقنى فى الطريق
لا عمره لحظة سابنى وكأنه ليا رفيق
يارب إمتى الفرج يا مفرج كل ضيق .
أمُنا هى الوحيدة إللى من قلبها حبتنا
وتبقى فى غاية السعادة بسبب لمتنا
لما كانت معانا مكناش نعرف قيمتها
يا خسارة عرفنا الحقيقة بعد ما فرقتنا .
هو أنت ليه ياحظ دايما عننا غايب ؟
وإن جيت لنا مرة تجيب معاك مصايب
نفسنا تصالحنا يا حظ ونبقالك حبايب
دا ربك عاوزنى كده مَتفكرنيش خايب .
قولى ليه يا زمن زادت عداوتنا
وما عاد فى أمان حتى فى بيتنا
فاكر زمان يا زمن فاكر لمتنا
ليه العداوة كترت وقلت محبتنا ؟