شلاليت !

كله غاوى دردشة ورص الكلام
هي ناقصة كل حبة نبتدى شد اللجام
فهمونى إيه الحكاية.. إيه سبب هذا الصدام
رد واحد قاللى أسكت.. إحنا مش ناقصين ملام
قلت له مين إنت قوللى.. إنت مين؟
قاللى واحد م الجماعة المرفوضين
اللى في الشارع وتحت الأرض يبقوا معزولين
ربنا جابنا عشان نحكم ونبقى مسئولين
يابنى افهم السياسة حوار.. وأفكارنا قرار
مش تعصب أو مجاملة كل حبة ليل نهار
الشعوب مش رأى واحد في المسار
كل شعب وله تاريخه كان هزيمة أو انتصار
قاللى مهما تقول مافيش للناس مصير
غير مصيرنا مهما كان صعب وعسير
تقبلونا ترفضونا.. إحنا إحنا نظام خطير
مش بيسمع أي كلمة من صغير أو كبير
قلت له مين اللى قال لك دا الكلام
قاللى ناس بينك وبينهم ألف عام
قلت له ما تفوق بقى يازعيم.. حرام
كل ما تبديه تعصب واحتدام
قال ما فيش فايدة أنا ماشى بطريق
أخرته ما أعرفش إيه.. لو فيه حريق
مش ح أسيبه.. قلت له أصلك غريق
مستحيل حتلاقى مخلص لك صديق