أبو طقة: جمعت 3 ملايين توكيل وينص!

بصفتي أتمتع بشعبية كبييييرة بين جميع الفشارين في مصر.. وعلى فكرة هما كتير قوي قوي..فقد تمكنت من جمع تلات ملايين توكيل وينص..شوف السيسي جمع 200 ألف توكيل وصباحي يادوب بيكمل 18 ألف توكيل.. أنا بقى خارج المنافسة..عارفين ليه..لأن الفشارين في بر مصر المحروسة عددهم ييجي 8 ملايين.. معظمهم من الجماعة اللي ماتتسماش...بأمارة إنهم قالوا مش هانرشح حد وفي الآخر رشحوا الشاطر..ولما كان ملطوط قاموا رشحوا الاستبن..طلع متخلف عقليا وقعد يفشر إلى أن أصبح رئيسا لمصر..ولما قعد ف الاتحادية مسح بفشره أبو لمعة الأصلي..بصراحة الفشارين اجتمعوا وأصدروا بيانا قالوا فيه: اعتزلنا الفشر بعد الفشار الكبير ما مسحنا بأستيكة..وقعد المتعوس يفشر وجماعته تصدقه..يلبس العمة للناس وهما بيلبسوها بمزاجهم..والنهضة جاية..جاية بعد شوية..جايبة معاها شنطة فيها ريالات ودولارات..وهاتعيشوا في عز وتاكلوا الوز.
قعد المتخلف يفشر لحد ما اتكنس هو وجماعته بمقشة واتحط ف جاروف واترمى ف الزبالة..لكن من قبلها كان فيه شوية ناس بيقولوا عليهم النخبة..دول برضه فشارين..بيعملوا م البحر طحينة..قاعدين ينظروا ويكدبوا ويفشروا..جتهم البلاوي زي صاحبهم اللي اسمه قريب من كلمة البلاوي.
وعشان شعبيتي والكدابين اللي عددهم كبييير قررت أترشح لانتخابات الرئاسة..وجمعت تلات ملايين توكيل وينص..وقعدت قدام لجنة الانتخابات أغني: بتلاتة وينص..تعالى بص!.