خالد تليمة: الدستور «منتج» لمجموعة اجتهدت وحاولت وأصوت ب«نعم»

قال خالد تليمة، نائب وزير الشباب، إنه سيصوت ب«نعم» على الدستور الجديد، رغم تحفظه على 5 مواد، مشيرا إلى أن مجموعة الحقوق التي وردت في الدستور «جيدة لحد كبير».
وأضاف «تليمة» في رسالة عبر صفحته الشخصية على موقع التواصل الاجتماعي «فيس بوك»، في الساعات الأولى صباح اليوم الثلاثاء، تحت عنوان «قبل التصويت»: «هذا الدستور لا يتجاوز كونه منتجا لمجموعة من الناس اجتهدت وحاولت، و(نعم) مش هتجيب استقرار ولا هتودى الجنة، اللى هيجيب استقرار هو إيماننا كمواطنين بكل حق انتزعناه في الدستور ده ومدى استعدادنا للدفاع عنه».
وتابع: «أنا هقول نعم للدستور لأنه في مجمله جيد، وبرغم اختلافي مع عدد من مواده التي لا تتجاوز ال5 مواد، إلا أن مجموعة الحقوق اللى وردت في الدستور جيدة لحد كبير».
وواصل: «طريقة الدعاية للدستور كانت مستفزة وفجة وخسرت الدستور واللى مقتنعين بيه مش كسبتهم»، موضحة: «لو هتقول (لا) لمجرد إن واحد من رجالة مبارك هيقول (نعم)، يبقى إنت بتعند مع نفسك مش معاه».
وأكد «تليمة»: «هقول نعم للدستور مش للفريق للسيسى، والسيسى لو عايز يترشح برغم موقفى الرافض لترشحه يقدم برنامج يخاطب بيه عقولنا لأنه بصراحه مفيش حد ليه جميل على البلد دى، أو على الأقل محدش ليه جميل عليا».