"الحرة للتغيير السلمى" تشارك فى ذكرى الثورة ب"عايزين نعيش"

أطلقت الجبهة الحرة للتغيير السلمى، دعوة على موقع التواصل الاجتماعى "فيس بوك" بعنوان "عايزين نعيش"، والتى تهدف إلى العيش بكرامة وحرية بلا خوف من موت يكون السبب فيه إهمال المسئولين.
تتضمن الدعوة الموجهة لنشطاء "فيس بوك": "عايزين نعيش من غير خوف على عيالنا يموتوا فى قطار زى اللى ماتوا فى قطار أسيوط وهم أطفال أو قطار البدرشين وهم شباب أو زى أسرة تموت فى مزلقان أرض اللواء وبرضه تحت القطار.. عايزين نعيش واحنا مطمنين فى بيوتنا من غير ما تنهار علينا زى اللى حصل فى الإسماعيلية وإسكندرية والمنصورة، بدون ما حد يكفرنا ولا يخونا ولا يخلينا جواسيس وعملاء ولا بتوع مؤمرات".
وأضافت "الجبهة" فى دعوتها: "عايزين نعيش بمرتب يكفينا أكل وشرب ومصاريف مدارس ومواصلات وكهرباء ومياه مع ارتفاع الأسعار، نلاقى مستشفيات فيها دكاترة وفيها علاج مش زى مستشفى الحوامدية أو البدرشين وغيرهم.. عايزين نعيش واحنا مطمنين إن مفيش محاكمات عسكرية للمدنيين وقضاء مستقل يحمينا من أى ظلم.. واحنا بنشوف كرامتنا جوه مصر وبراها متصانة وسلطة بتحميها وبتدافع عنا وعن الجيزاوى ونجلاء وفا".
واختتمت الجبهة دعوتها: "عايزين نعيش ونحب ونحس إننا مصريين ويبقى الدين لله والوطن للجميع، من حقنا نعيش".