حديث ربما حدث

النائب العام المستقيل "كده وكده" والمرشد
المرشد: ألو – السلام عليكم - أيوا يا طلعت أنت إيه اللى عملته ده إزاى تقدم استقالتك؟
النائب المستقيل كده وكده: عليكم السلام، أنا احترمت نفسى واحترمت رغبة أعضاء النيابة لأن عندهم حق – أنا نفسى كنت ضمن الداعين لعدم تدخل الرئاسة فى تعيين النائب العام، ييجى اليوم اللى أكسر ما كنت أطالب به.
المرشد: يعنى إحنا نعمل إعلان دستورى يقلب الدنيا ونجيبك فى هذا المنصب الرفيع وأنت تتخلى عننا بكل سهولة.
النائب: لم أتخل عنكم، لكن أعضاء النيابة رفضوا التعاون ومصالح الناس توقفت واحتراما للمنصب كان لازم أستقيل.
المرشد: وإحنا ما لناش احترام؟
النائب: لا طبعا ليكم كل الاحترام وده هو اللى أوقعنى فى خطأ كبير عندما طلبت من المستشار مصطفى خاطر أن يحبس الشباب اللى قبض عليهم الإخوان أمام الاتحادية وطبعا سيادتك شفت النتيجة والفضيحة اللى حصلت، وكمان أخدت برأيكم وبدلا من علاج الأمر عاندت وأمرت بنقله كما نصحنى مستشارو الإخوان، وهو ما زاد الطين بلة، وفى النهاية تراجعت عن نقله لأن الأمر كله خطأ فى خطأ، أعتقد أن استقالتى هى أفضل شىء قمت به.
المرشد: يعنى إيه أفضل شىء قمت به أنت غدا ترسل إلى مجلس القضاء الأعلى مذكرة تتراجع فيها عن الاستقالة، إحنا بنبنى دولة وأنت أحد أركان هذا البناء.
النائب: إزاى أرجع فى الاستقالة دى تبقى فضيحة تانية.
المرشد: إيه يا طلعت فضيحة إيه، إحنا كل شوية بنخلى مرسى يرجع فى قراراته، وبعدين إحنا أصدرنا بيان أمس نمهد فيه لتراجعك عن الاستقاله قلنا فيه ان ما حدث مع النائب العام بلطجة من أعضاء النيابة، كما أنهم هددوك بالسلاح لتستقيل.
النائب: لكن ده ما حصلش!
المرشد: أنت لن تقول ذلك فى مذكرتك، لكن هتقول إنهم ضغطوا عليك بالقوة لتستقيل وهذا لا يليق بالنائب العام ولا يمكن أن تترك المنصب بهذه الطريقة.
النائب: لكن ده هيسبب أزمة كبيرة تانية وغضب أكبر بين القضاة كلهم.
المرشد: يا طلعت إحنا هنزل شبابنا يحموك ويؤيدو قرار عودتك، ده غير إن الناس عارفة الفساد الموجود فى القضاء وطبعا الناس مش هتميز إن فيه قضاة شرفاء واقفين ضدك، وخاصة أن الزند فى الصورة وهذا يخدمنا فى عملية تشويه من يطالبوا باستقالتك.
النائب: ولو تجمهر أعضاء النيابة تانى أمام مكتبى وأضربوا عن العمل هتبقى أزمة كبيرة.
المرشد: دى فترة وهتمر وممكن تذهب لممارسة عملك من مجمع محاكم التجمع الخامس بعيد عن الدوشة – يا طلعت إنت عارف إن دورك مهم فى القضاء على الفساد والتخلص من أعداء مشروع بناء النهضة وفى قضايا كتير قادمة، ده غير القضايا المرفوعة ضد عدد كبير من أعضاء الجماعة.
النائب: عندك حق أنا جالى أمس أكثر من بلاغ ضد محمود غزلان والعريان بأن هما السبب فى التحريض على أحداث الاتحادية.
المرشد: يعنى اتفقنا يا طلعت هترسل المذكرة للقضاء الأعلى غدا.
النائب: حاضر يا د. بديع رغم أن الأمر صعب إلا أننا يهمنا التخلص من الفساد.
المرشد: بارك الله فيك وجزاك كل خير.