عايدة رياض تبكي على الهواء وتكشف موعد اعتزالها التمثيل

عايدة رياض، قالت الفنانة عايدة رياض: "سأفكر في الاعتزال إذا مقدرتش أقوم من على السرير علشان أنزل، والفن أجمل حاجة في عمري كله".
فوبيا عايدة رياض
ولفتت خلال الجزء الثاني من لقائها ببرنامج "واحد من الناس" الذي يقدمه الإعلامي عمرو الليثي بقناة "الحياة": "عندي فوبيا من الأدوار العليا"

بكاء عايدة رياض خلال تذكر ذكرياتها
وأشارت عايدة رياض باكية: "لو رجع بيا الزمن لوراء هسيبه زي ما هو حصل وهيكون زي ما حصل ومفيش حد في الدنيا بيبقى سعيد ولا حزين علطول، الحياة وفيها اوقات فرحة والم وحزن، فيه حاجات بتجرحني وبتضايقني بس بعديها بقول لعايدة رياض عايز اقولك رغم انك مريت بحاجات مش كويسة بس كان فيه نجاحات ولحظات حلوة ".

نعم الله علي عايدة رياض
وتابعت:"اشتغلت مع ناس عظماء وربنا شفاني من حاجات كتير واشكر ربنا علي الصحة والستر وحب الناس وانه موقفني لحد دلوقتي ومش مخليني محتاجة لأي حد وربنا هو اللي معايا علطول وعائلتي مهمة جدا وكل حاجة مريت بيها اتعلمت بيها قوتني علشان أنا مظلومة ولو مكنتش مظلومة مكنتش هقدر أواجه الدنيا ولا الحياة وربنا له حكم والبلوة اللى بتيجي ممكن تكون فدت مصيبة أكبر منها وربنا اداني القوة والستر واشكر ربنا لإني في حتة جميلة ويكفى اني بصحى الصبح وبقوم واعمل شاي لإني لسه فيا الصحة".
عايدة رياض: أفضل العمل مع محمد رمضان عن السقا وهذا أسوأ فيلم بتاريخي
عايدة رياض: محرم فؤاد مكانش بيخلف ومكالمة حب سبب العلقة الساخنة بلندن (فيديو)

في الجزء الأول من نفس اللقاء، قالت الفنانة عايدة رياض: "لما محرم فؤاد طلب يتجوزني مكانش فيه ما بيننا قصة حب ولا علاقة عاطفية، قبلها بشهرين كنت مخطوبة من شخص بحبه، بس الموضوع مكملش، فقلت غيظا فيه هتخطب لمحرم واعمل خطوبة ويشوف بقى أنا هتجوز مين".

قصة حب محرم فؤاد لعايدة رياض

وأضافت خلال لقائها ببرنامج "واحد من الناس" الذي يقدمه الإعلامي عمرو الليثي بقناة "الحياة": "محرم فؤاد لما خطبني كان أكبر مني ب20 سنة، وهو كان متجوز قبل كدة، وعنده ابن اسمه طارق، وبعد ما اتجوزته بشهرين كنت بحبه جدا وهو كمان كان بيحبني أكتر".


مشكلة الإنجاب عند محرم فؤاد

وتابعت عايدة رياض: "اتجوزت محرم فؤاد لمدة 13 سنة، واللي خلى الجواز ميستمرش أولا إني مخلفتش منه، ومكنتش رافضة الإنجاب خالص، وهو مكانش بيقول ظروفه.. هو خلِّف بالعافية، وكنت باروح للدكتور أكشف، ولما آجي أقول له روح للدكتور يرفض، ولو كنت أنجبت منه كان ممكن زواجنا يستمر، وفيه حاجات مقدرش أقولها عن علاقتنا الزوجية ولكنه رجل مصري صميم وطيب".

صدمة عايدة رياض من محرم فؤاد

ولفتت: "مع العشرة لقيت شوية حاجات اتصدمت فيها بعد جوازي من محرم فؤاد، وكنت بحس بعدم الأمان معاه، وكمان فيه اختلاف في الديانة، وحسيت إن المستقبل مش مريح، والبيت اللي كنا قاعدين فيه إيجار، ومكانش فيه مكان ليا وأنا كنت صغيرة".


فيلم "الغول" والابتعاد عن التمثيل
وأشارت: "أنا لما تجوزت محرم فؤاد قعدت في البيت ومنزلتش خالص وجالي فيلم "الغول"، بعتهولي الزعيم عادل إمام لحد البيت مشفتهوش ولا عرفت أشتغله، واكتشفت محرم في مواقف معينة حاجات صدمتني، وقلت ليه قعدت في البيت وأبطل تمثيل".

غيرة محرم فؤاد على عايدة رياض
ولفتت عايدة رياض:"محرم فؤاد قعدني في البيت بسبب فارق السن ولإنه رجل غيور أوي وخايف عليا، وأنا اتصدمت بأكتر من حاجة شخصية معاه".

سبب ضرب محرم فؤاد لعايدة رياض

وأشارت عايدة رياض: "ضربني علقة سخنة في لندن خلال فترة الخطوبة بعد لما سمع مكالماتي لطارق اللي كنت بحبه، وسمعني وأنا بقوله مش طايقة أكمل مع محرم، وياريت نرجع لبعض وأنا بحبك، ولكن بعد ما ضربني اتجوزنا".

نقدم لكم من خلال موقع (فيتو)، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبارالرياضة ، أخبارمصر، أخباراقتصاد ، أخبارالمحافظات ، أخبارالسياسة، أخبارالحوادث، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الثقافية والأدبية.