23 صورة ترصد زيارة السيسي لكاتدرائية ميلاد المسيح بالعاصمة الجديدة اليوم

هنأ الرئيس عبد الفتاح السيسي، البابا تواضروس الثاني بعيد الميلاد المجيد، مقدمًا له باقة ورد، وذلك خلال حضوره في كاتدرائية ميلاد المسيح.
وقال عبد الفتاح السيسي، مهنئًا الأقباط بعيد الميلاد المجيد:"كل سنة وأنتم طيبين ويارب السنة دي تكون سنة خير وسلام وسعادة وأمن وأمان علينا كلنا مش بس في مصر ولكن في العالم كله".
وتابع:"النهارده مناسبة جميلة وسعيدة وكان المفروض اقول كل سنة وانتو طيبين وأعطي الفرصة لقداسة البابا تواضروس، أوجه كل التقدير والاحترام والاعتزاز للبابا تواضروس وليكم كلكم".

وأضاف:"عايز اقولكم انتوا متعرفوش مدى المحبة والتقدير والاعتزاز اللى أنا اقدر به قداسة البابا تواضروس الثاني، وفي كل مرة أسمع حديث لقداسته او حتى الكتاب اللى صدر عنه قداسته اجد فيه حكمة وبلاغة عظيمة ومش هنسي ابدا حديثه لما قال الأديان تتوافق ومش لازم الأديان تتطابق، وبقول كده لعشان تفضل محبتنا لبعض بدون تمييز ودي لازم تبقى دي متاصلة في نفوسنا، إحنا محتاجين دايما في كل مناسبة نأكد ان احنا واحد مفيش أي شكل من اشكال التفرقة ما بينا لإن لو فيه تفرقة مننجحش ابدا والكلام ده مش بس للأقباط ولكن لينا كلنا كل الشعب واحنا بنحبكم، كل سنة وانتوا طيبين وعيد سعيد عليكم".
وقال الرئيس عبد الفتاح السيسي:"انا شايف ان الناس قلقانة.. الناس في مصر قلقانة وخايفة مش هقول إن ده مش مبرر بس لو كان كلامي يطمنكوا لازم تطمنوا إحنا مش مبنخبيش عليكم حاجة ولو سمحت يا كل المصريين أنا في كل مناسبة بتكلم وأقول الحكاية علشان تبقوا عارفينها متديش ودنك لحد أقل ما فيه مش مسئول، كل واحد يعرف علي قده الموظف المدير اللى بعده وبعده لحد لما نوصل لأعلي مستوي ومتولي اكبر مسئولية، يعني محدش يعرف زي قداسة البابا تواضروس في شئون الكنيسة، اسمعوا اللى يتكلم لو مكنش يعرف وأكيد مش هيبقى عارف".
وتابع:"اقول للمصريين متخافوش وبكلم كل المصريين متخافوش لسببين الأول إن ربنا موجود ومش هيسيبنا، وهو أعز وأكبر مننا كلنا، ثانيا إننا كمسئولين حريصين بعد الأزمة العالمية اللى تأثيراتها كبيرة جدا والدنيا بعد الأزمة هتخلي الدنيا مختلفة تماما الفترة للى جاية وإحنا الحمد لله رب العالمين ماشيين كويس ولو كنا بنعاني بس منخافش ومنقلقش ومش هسيبنا يعني، لو فيه حاجة هاعملها هقولكم يقولك أصل قناة السويس هيبيعوها ولو فيه حاجة هقولها، هي مصر لو تعبت هنتخلى عنها لأ طبعا".
وقال الرئيس عبد الفتاح السيسي كل عام وشعبنا وبلدنا بخير بمناسبة عيد الميلاد المجيد، تلك المناسبة العطرة التي تجمعنا على حب الوطن وتؤكد أننا على طريق المواطنة سائرون ولن نحيد أبدا عن التعايش الإنساني والإيمان من الأصيل بوحدة الوطن والجماعة الإنسانية.
وأضاف الرئيس.إنني أدعو في هذه المناسبة لاستلهام المعاني العطرة التي أرساها السيد المسيح عليه السلام من الحب والتسامح والعفو والإحسان.
كل عام وأنتم بكل الخير والسلام،
ومصر دائما وأبدا في أمن وأمان.