قالت الفنانة شيرين عبد الوهاب: "أنا زي البمب وحلوة خالص فيه حد يبقى بيحبه ناس كتير وشعوب بتقوم وتقعد في وسط مشاكلهم فاكرني، أنا سعيدة بيكم وبتدفى بيكم، وأنا كويسة ولسه بخضع لعلاجي النفسي اللي بخضع له منذ إنجابي بناتي". وأضافت خلال مداخلة هاتفية ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "ما بقيتش محتاجة لعلاج ولا أدوية بعد خروجي من المستشفى".
وتابعت: "أنا ممتنة جدًّا للناس وبقول لهم انتوا تعبتوا فيَّ وعلشاني وعمري ما هخذلكم أبدًا وأنا ممتنة لحبهم ليَّ وبشكر اللي قال كلمة حلوة أو وحشة في حقي لإن كل ده نابع من حبهم ليَّ".
ولفتت: "أيامي في المستشفى كانت صعبة لأني اتخدت على خوانة، وتاني يوم صحيت في المستشفى قلت انا قاعدة في مكان أمين وكل الناس اللى فيه بتحبني وخايفين عليَّ وباكل أحسن أكل وأحسن نومة فإيه المشكلة ارتاح ليا يومين، وبقيت أحسن والناس كانوا مدلعني".
وأكملت: "وعسى أن تكرهوا شيئًا وهو خير لكم، وبشكر محمد السيد عبد الوهاب أخويا إنه عرفني بالمستشفى دي والناس المحترمين دول اللي هما راعوني وكانوا بيخافوا عليَّ وعلموني أنام وأصحى بدري ودلوقتِ بصحى الساعة 9 الصبح".
وتابعت: "أشكر صحافة بلدي والوطن العربي والأقلام اللي كتبت حلو واللي جرحت، وأي قضية بيني وبين أخويا هشيلها وهتنازل عليها لأني شيرين اللي قلبها متسامح وأنا بخف أكتر لما بسامح كل الناس، ومش هرضى إن ممكن أمي تبات يوم واحد تنام باكية على مخدتها على أخويا، والحمد لله على اللي حصل لي".
