خبيت مرضي بالسرطان عن أمي.. هيثم شاكر يروي تفاصيل صعبة بعد إصابته بالمرض اللعين | فيديو

قال الفنان هيثم شاكر: "ناس قليلين اللي عرفوا بالصدفة أزمتي المرضية الكبيرة، وأنا بحب دايمًا أشيل اللي حواليا محدش يشيلني، وأتحمل مسئولية الناس اللي حواليا خاصة عائلتي، ومش بحب أصعب على حد".

إخفاء إصابته بالسرطان عن والدته
وتابع خلال لقائه ببرنامج "معكم" الذي تقدمه الإعلامية منى الشاذلي بقناة "سي بي سي: "خبيت مرضي بالسرطان عن والدتي الله يرحمها".

وفاة الأم قبل علمها بإصابته بالسرطان
ولفت: "والدتي توفيت من غير ما تعرف إني مصاب بالسرطان، ولكن الحمد لله على كل حاجة حصلت لي".
وأشار: "أنا كنت تعبت واكتشفت أني عندي سرطان في القولون، وزي أي بني آدم حسيت أن حياتي انتهت واستسلمت وخلاص مستني الموت في أي وقت، وسافرت أتعالج بره ومحدش عرف بمرضي غير لزوجتي وأهلي باستثناء والدتي، واستسلمت في البداية وكنت شايف أن الحياة سودة وكنت مستني قضاء ربنا، وخلاص حسيت أن حياتي بتنتهي".
وتابع: "كان فيه طبيب نفسي يتابع حالتي وقاللي لو انت مستسلم ومستني قضاء ربنا يحصل طيب ما تحاول تعيش اليومين اللي فاضلين من عمرك، ومحدش عارف الغيب، وبعدين واحدة واحدة بقيت أتشبث بالحياة أكتر وأتعالج وكنت شغال في ألبوم "أحلى قرار" واختار أغاني الملحنين بيبعتوها لي على التليفون بسمعها وأبعتها للموزعين وأنزل مصر أشتغلها وأرجع أسافر وأكمل علاج، إلى أن ربنا سبحانه وتعالى أكرمني ومنَّ عليَّ بالشفاء".
تشبث هيثم شاكر بالأمل
وأكمل: "مهما كانت الدنيا سودة ربنا بيفرجها وفيه أمل، وربنا كبير وفوق كل شيء، وهو رب قلوب وعالم بكل حاجة واختبارات لكل صبرنا وإيماننا به".
وأشار: "تجربة إصابتي بالسرطان من 10 سنين، وبعد فترة اليأس اللي مريت بيها بعد علمي بالمرض مع الطبيب النفسي ابتديت أفوق لنفسي وقربت من ربنا أكتر، وكنت متلهفًا لفكرة أني أخلص كورس العلاج ولقيت نفسي بستجيب للعلاج والدنيا بتتحسن، وعملت عمليات جراحية في معدتي عبارة عن ترقيع المعدة بعد حدوث ثقب، وخلال العلاج من المعدة اكتشفنا مبكرًا إصابتي بالسرطان، والحمد لله أتعالجت".
هيثم شاكر يكشف سر بكائه على المسرح خلال حفله بجدة| فيديو
الأربعاء.. هيثم شاكر يروي أسرارًا جديدة عن معاناته مع السرطان في "معكم منى الشاذلي"
ولفت: "أمي كانت بالنسبة كل حاجة وأقرب شخص ليا في الدنيا، وخوفت أعرفها إصابتي بالسرطان لأنها مكنتش هتستحمل، ولكن موتها كسرني".
وأضاف: "فيه ناس قريبين مني كانوا عارفين إصابتي بالسرطان وللأسف ملقتهمش جنبي، وفيه ناس مكنوش قريبين مني في مرضي لقيتهم يستاهلوا يكونوا قريبين، وفترة المرض خلتني تعيد حساباتي في الناس اللي حواليا".