كل حاجة وليها وقت

كل حاجة
كل حاجة وليها وقت
بص فوق أو بص تحت
مش ح تلاقى في يوم الجمعة
شيء راح يحصل يوم السبت
شوف كام حاجة أخدتها
جت لك في يوم ما احتجتها
ولسه فيها حاجات كتير
ح تيجى برضه في وقتها
كل حاجة وليها غاية
تبتدى وقت البداية
واللى شاطر فينا يعرف
اللى يحصل في النهاية
كل حاجة وليها ضد
يوم فيه حب ويوم فيه بغض
مرة ح نضحك مرة ح نبكى
مرة ح نسكت مرة نرد
كل حاجة وفيها درس
بس مين يعرف يحس
وقت ما تفرح شيلك حاجة
يمكن تنفع وقت البؤس
كل حاجة وليها مكانها
زى ماليها برضه زمانها
لحظة ما الاتنين يتلاقوا
شيء ح يدلك على عنوانها
طول ما الوقت يعدى يدور
وشمس الدنيا تطلّع نور
ظبط ساعتك وادعى لربك
يبعت يعدل فيها أمور