الحضري: مفيش مشكلة في اتهام جوزيه ليا بالكدب.. وهذا أكبر خطأ في حياتي | فيديو

علق عصام الحضري مدرب حراس مرمى منتخب مصر، على اتهام مانويل جوزيه المدير الفني الأسبق للنادي الأهلي، بأنه كذاب كبير.
رد الحضري على اتهام جوزيه
وقال "الحضري" خلال لقائه ببرنامج "العرافة" المذاع علي قناة "المحور": "جوزيه بيقول عليا كداب كبير وانا بقول مفيش مشاكل".
مشاجرات مع جوزيه
وتابع: "في أحداث كرة القدم ممكن يحدث خلاف بين اللاعبين أو اللاعب والمدرب وأثناء الماتشات والتمرين كان بيحصل بيني وبين مانويل جوزيه خناقات كتيرة وقعدت 4 سنين على الوضع ده، وانا كنت بفكر في الكورة ومستوايا وانى أخد بطولات وفي ال 4 سنين أخدت حوالي 25 بطولة معاه".
وأضاف: "جوزيه له احترامه وتقديره كمدير فني وهو بيحترمني كحارس مرمى ولو أنا حارس وحش وكداب وبحب الفلوس، هو أو أي حد تاني بيجري في شغله وراء الفلوس وهو ساب بلده علشان الأجر وانا كمان زيه".
خطأ الحضري الوحيد
واستطرد: "أنا وجوزيه اكبر اتنين دلوقتي أصدقاء، وأنا محترفتش علشان الفلوس وكان أمنية حياتي إنى أحترف، وأيضا احترفت علشان الفلوس، وخروجي من الأهلى الخطأ الوحيد اللى في حياتي إنى سيبت الأهلي وانا غلطان".
عصام الحضري: محمد صلاح اتكلم عن اعتزاله الدولي بعد الخسارة أمام السنغال | فيديو
ضربونا بالطوب والشباشب.. عصام الحضري يكشف كواليس ومفاجآت جديدة عن مباراة السنغال | فيديو
وكشف عصام الحضري مدرب حراس مرمى منتخب مصر، في نفس اللقاء، كواليس جديدة عن أحداث مباراة السنغال في العاصمة داكار.
شحن الجماهير السنغالية
وقال: "قبل مباراة السنغال في داكار رأينا حالة شحن كبير ضد منتخب مصر بلاعبيه وجهازه الفني والإداري والطبي".
الاعتداء على الحراس
وأضاف: "لما جينا نسخن في الملعب لقينا زجاج مياه وطوب بيتحدف علينا، وأنا بسخن الحراس ما كنتش بشوف الكورة من كتر ما الليزر كان متسلط علينا، كمية الليزر كانت بتغطي اللاعيبة، والفانلات الحمراء بتاعتنا لونها تحول للأخضر".
موقف غربال ومراقب المباراة
وتابع: "اتكلمنا مع حكم المباراة مصطفى غربال قال لنا الموضوع كله مع المراقب ولما روحنا للمراقب قال لنا هبطل الليزر ونوقف حدف الطوب وزجاجات المياه".
وأكمل: "كانت هناك آلاف من الليزر في ملعب السنغال، ولو كلمنا الحكم يوقف الماتش كان هيحطنا تحت ضغط ويعملنا مشكلة، وقلنا لمصطفى غربال على زجاجات المياه اللي اتحدفت عليه ومعملش حاجة".
سبب إخفاق محمد صلاح
وأشار: "الشناوي لما صد ركلة الجزاء مكنش الليزر مسلط عليه بشكل مكثف إنما محمد صلاح وهو بيشوط ضربة الجزاء كل الليزر كان ضارب في وشه وده أثر في تسديده للكورة، وأنا بمران الحراس أثر فيَّ".
سباب وشتائم جماهير السنغال
ولفت: "الإذاعة الداخلية لملعب السنغال كانت بتشحن الجماهير، وما كناش متوقعين إن الأجواء دي في الملعب وتعرضنا لألفاظ وسباب من أول ما دخلنا في المطار".
وأوضح: "علشان نوصل الملعب من الفندق استغرق مننا ساعتين ودي عمرها ما تحصل، ووصلنا الملعب قبل الماتش بساعة ودي حاجة غريبة واللاعب ما يلحقش يلبس ولا يسخن ولا يعمل إطالات، وطول الطريق واحنا ماشيين في اتجاهنا للمعب زحام فوق ما يمكن تصوره، وكان فيه فندق قريب للملعب بحوالي 10 دقايق وبسبب منتخب السنغال رفضوا".
طلب محمد صلاح
وأكد: "محمد صلاح طلب يسدد ركلة الجزاء الأولى أمام السنغال".