«البوسة» العملة الرسمية لجمهورية مصر العربية فى «الأبعادية الإخوانية»

قابل مواطن مصرى آخر فوجده مغتمًا حزينًا مهمومًا، فبادره بالسؤال: "أنت متضايق ليه يا مواطن وشايل طاجن ستك؟ ما خلاص كل مشاكلنا اتحلت الإخوان قالوا هيغلبونا بالحب، وهيقربونا بالحب، وهيكسونا بالحب، وهيفهمونا غلطنا بالحب، وهيأكلونا ويشربونا بالحب، وهيعلمونا، ويشغلونا ويعالجونا بالحب، أنت مسمعتش المرشد ومرسى وهما بيقولوا كده؟".
المواطن: لأ مسمعتش.
الآخر: طيب أديك سمعت.
المواطن: طيب أنا مش فاهم يعنى إيه هنأكل، ونشرب بالحب.
الآخر: يعنى إنت تروح الفرن تشترى عيش، ولما الفران يطلب منك الحساب أرميله بوسة ع الطاير، وعند الجزار هتأخد كيلو لحمة، وبعد الجزار ميلفهولك تلف ورا الأورمة وتأخده بالحضن وتبوسه بوستين، وفى محطة البنزين بعد ما تمون إدى للعامل على كل لتر بوسة، ده لو بنزين تمانين لكن لو البنزين تسعين «أعمل اللى يقدرك ربنا عليه معاه»، وبتاع الأنابيب لما يطلعلك الأنبوبة الدور السادس، ولا السابع، ولا حتى العاشر، قعده وريحه، وأعمله كوباية شاى، وطبطب عليه، وخده فى حضنك، وبوسه بوسة كبييييرة، وراضيه بالحب، والمدرس بتاع ابنك لما يجى يطالب بتمن الدروس الخصوصية اللى إداها لابنك بوسه هو كمان، وهو بعد ما يتباس هيتراضى ويمشى علطول، ده أحنا أيامنا فلة.
فى السوق هنشترى الخضار بالحب، فى السوبر ماركت هنشترى لوازمنا بالحب، فى الصيدلية هنشترى أدويتنا بالحب، وطبعًا إيجار شققنا أنت عارف هتعمل إيه مع صاحب الملك، لما يجيلك آخر الشهر يطالبك بالإجار....، وهنجهز بناتنا بالحب، ونجوز ولادنا بالحب.
كل واحد فينا هيبقى ملكه مصلحة لصك العملة موجودة فى شفايفه!! أنت مبتعرفش تبوووووس؟
المواطن: بعرف
الآخر: طيب بوس، كل ما عليك أنك تبوس، إحنا هنقضيها أحضان، وبوس وهيبقى أغنى واحد فينا أكتر واحد بيعرف يبوس، كله بالبوس، إحنا هنبقى جمهورية البوس، متجيب بوسة!!