ورق عنب.. بط.. تمر هندي.. أحمدك يا رب

إمبارح بعد السحور نمت وأنا بحلم بساعة الفطار.. وكان كل أملي أقدر اشرب ميه بعد الحر اللي أنا نمت فيه لمدة 12 ساعة، ده وطبعا بعد ما صحيت فضلت ألف نحون نفسي وأتسائل ازاي اقدر أسلي صيامي بعد ما طبخت وقعدت أتفرج على الأكل، لقيت الوقت لسة كتير أوي والفطار لسه ماجاش.
افتح التليفزيون أتفاجئ إن فيه فطوطة وفوزاير نيللي "والله نيللي"، وكمان فوزاير شريهان وصيام صيام وفجأة حسيت إني دخلت الزمن ورجعت يجي 20 سنة ورا، والصراحة عذرتهم ما هي السنة كلها كانت مليانة نكد هيلحقوا يعملوا شغل كوميديا إمتى؟؟
وفي عز ما أنا منهمكة في تحليل ازاي آلة الزمن بتشتغل.
لقيت الشارع كله هوس، انتابني هاجس بأنه ربما يكون فيه هجوم وشيك وقعدت أهيء لنفسي أن ده هدوء ما قبل العاصفة وفي عز خيالاتي العظيمة باسكريبت فيلم أكشن رائع لقيت الأذان بيأذن ودخلت جري من البلكونة وكأني على بابا في فيلم الأربعين ساعة صيام والجملة الوحيدة اللي ما قدرتش أبطل أقولها هي: "ورق عنب.. بط.. تمر هندي..ميه.. أحمدك ياااااااااااااااارب".