تفاصيل افتتاح السيسي مصنع كيما 2 للأسمدة وتفقد محطة سكك حديد أسوان وتدشين الوحدات المتحركة الجديدة

افتتح الرئيس عبد الفتاح السيسي مصنع اليوريا ونترات الأمونيا بمنطقة كيما 2 بمحافظة أسوان كما تفقد الرئيس المصنع واستمع إلى شرح تفصيلي كما التقط الرئيس الصور التذكارية مع العمال والقيادات.
كما تفقد الرئيس محطة سكك حديد أسوان ويشهد تدشين الوحدات المتحركة الجديدة من قاطرات وعربات السكك الحديدية.
ووجه الرئيس عبدالفتاح السيسي التهنئة للحكومة وقطاع الأعمال على افتتاح مصنع كيما ومحلج الفيوم المتطور.
وقال:"أهنيكم.. قطاع الأعمال والحكومة على المشروع ده والافتتاحات سواء مصنع كيما ومحلج الفيوم، ويمكن في المناسبات الجميلة دي نقول كلام جميل".
وأضاف: مش هنسى شاب قالى مصنع كيما بيرمي مخلفات في النيل وعملوا حاجة علشان الريحة متطلعش.. وخدناه وروحنا وقولناله احنا شغالين في ده وهنعمله".
وقال الرئيس: الوزير بيقول بعنا الأرض علشان ناخد قروض.. بعنا الاراضى علشان ده ونجيب جزء من الفلوس.. مش عاوزين نرجع تاني للخراب والمصنع ده بعد شوية يرجع يتدهور تاني.. في 3 حاجات التسعير والإدارة والحوكمة بنعمل إجراء علشان نحقق التسعير علشان يبقا سعر مناسب للزراعة فى مصر".
وأضاف الرئيس السيسي: الطن كان بتمن ودلوقتي بتمن تاني، نتيجة السنتين اللى فاتوا.. وبالتالى عاوز تصدر وعاوز احتياجات السوق والاسعار في السوق مدعومة والسعر وصل الى تلت السعر اللى في العالم.
وتابع الرئيس: التسعير محتاج دايما ازاى نحل فيه وهقول للمزارعين ووزارة الزراعة يا جماعة نظم الري الحديثة الزراعة الحديثة تخلي كمية الأسمدة المستخدمة اقل بنسبة 50 او 40 % بدل ما تشترى شيكارتين تشترى واحدة أصدرها بره".
واستعرض الرئيس بعض أوضاع الدولة المصرية في الماضى، قائلا: "لن انسى عام 2011.. والمفروض يا مصريين مش تنسوا العام ده.. كل إجراء وخطوة مش تنسوا العام ده.. اللى أنقذكم ربنا وحده.. وربنا اللى أنقذ البلد دى من مصاير الخراب والدمار.. ولأجل خاطر ال 100 مليون مصري".
وأضاف الرئيس السيسي: "ربنا انقذ البلد دى علشان البسطاء والغلابة.. لحكمة إلهية وربنا انقذها.. وهل هنكرر نفس المسار تانى.. لا طبعا.. الكلام ده لو هيزعلكم انا هاجى عليكم.. علشان خايف على البلد..مش تزعل الا على نفسك وانك ممكن تكون سبب في دمار بلدك وخرابها".
وقال الرئيس السيسي، أن المصانع الجديدة يجب أن يتوافر لها عناصر النجاح بشكل كامل، قائلا: "أنا عاوز فرص نجاح للمصانع والشركات الجديدة منعا لتكرار اللى فات.
وأضاف: اى مستثمر أو قطاع خاص لما بيعمل مصنع جديد مش بيكون عنده مشكلة في تحديث العمل داخل المصنع ده.. لانه قاعد بيدير صح.. الإدارة الجديدة مفيش فيها خواطر.. مش هعين حد في المصنع ملوش لزمة.. علشان قريبى أو معرفتى أو كلام هذا القبيل".
واستكمل الرئيس السيسي: القطاع الخاص شريك معانا.. هيدفع ويبقى معانا بفلوسه بقى.. بتوع قطاع الاعمال هيزعلوا منى.. انا بتكلم في مصلحة أكبر.. بتكلم في مصلحة البلد.. انها تعيش وتكبر.. البلد تعيش وتكبر وتبقى المصانع عبارة عن أداة في الاقتصاد ورفاهية المجتمع.. وده مش هيحصل إلا لما تبقى منضبط في التعيين والتشغيل".
وقال الرئيس السيسي: أنا لا بخاف ولا بيهمني إلا البلد، العمر ده بتاع ربنا والمكان اللي فيه بتاع ربنا".
وأكد الرئيس السيسي أن الدولة المصرية ترحب بالقطاع الخاص، قائلا: "القطاع الخاص عاوز يتفضل معانا في المصانع والمشروعات الجديدة يتفضل.. وده كلام بقوله لرابع مرة.. اهلا وسهلا بالقطاع الخاص.. احنا محتاجين القطاع الخاص معانا.. احنا أثبتنا أننا غير أكفاء في الإدارة على مدار 40 سنة اللى فاتوا.. ده عيب عيب الاستمرار على نفس المسار والاقتراض علشان التطوير.. وبعد شوية اانا مش مش هكون موجود والوزير كمان مش هيكون موجود والمصانع دى تتدهور تانى لان منظومة الأداء نتائجها الحقيقية حاجة".
وأضاف السيسي: "الحوكمة.. كل قرش بيتصرف في المصانع دى وكل لمبة شغالة.. بقول كل قرش.. ولو حطينا في دماغنا.. الحملة اللى بتنقل العمالة جزء من الحوكمة.. هنقول منين.. القطاع الخاص بيعمل كده.. والوزير هشام أكثر واحد شوفته في قطاع الاعمال حريص على الإصلاح.. مش انت جيت قولتلى الناس بنت على أراضى قطاع الاعمال فلل وشاليهات وبيوت يا دكتور مصطفى.. كل مصنع كان موجود له حتة أرض زيادة.. ونعمل جمعية وبنبى مساكن للعمال وماله.. ولكن كل حاجة لازم تكون بحساب.. ده مش تكون الكهرباء والمياه والغاز على الشركة.. مش مندهشين ومستغربين.. عرفتوا ليه بلدكم كانت هتروح في 2011.. وكانت هتتخرب وتضيع وانا بتكلم ليه علشان البلد".
وقال الرئيس:إن التسعير نقدر نحله إزاى مع وزارة الزراعة وكنا قلنا يا جماعة حاولوا تقدموا الدعم المقدم للمزارعين الى فلوس تتحط، عاوز أدى للفلاح دعم في شيكارة ولا اثنين طبقا للمعايير المعمول بيها للفدان طيب ما ادهاله دعم نقدى علشان أحرر وأمنع الفساد المحتمل في إدارة المنظومة اللى مشيين فيها".
واستكمل: مش ده التجربة بتاعتنا على مدى 50 سنة، طيب التجربة دى مش قابلة للتصويب وده معناه ان اللى قابلنا مش كانوا وحشين..لكن التجربة قالت انها لازم تتصلح..نصلحها ولا نقعد نتفرج عليها..كلموا الناس زى ما انا بتكلم هتجدوا الناس معاكم اكتر مما تتخيلوا.لأن الناس عاوزة المصلحة والمواطن عاوز المصلحة ومصلحة بلده واستحمل معانا السبع سنين اللى فاتوا في إجراءات صعبة جدا لانه حس بفطرته وذكائه ان فعلا فيه محاولة للإصلاح من جانب الدولة".
وأكد السيسى، أن الدولة المصرية تسعى للحفاظ على العمالة خلال عملية الإصلاح في قطاع الأعمال، قائلا: "كل النقاش في عملية الإصلاح في قطاع الأعمال شايفين العمالة والحفاظ على حقوقها.. وبنحاول نعمل إصلاح ممكن ندهوس في الناس لا طبعا.. كل إجراء للتصويب والإصلاح لا يمكن يكون على حساب العمال".
وأضاف الرئيس السيسي: "العامل ملوش ذنب في عملية الإصلاح.. وبالتالي مفيش إجراء إلا بنأكد الحفاظ على حقوق العمال.. والدولة فقط تتحمل التكلفة.. ومش العامل.. اهل الشر بياخدوا الكلام وبيعملوا عليه.. الإصلاح لن يكون على حساب حقوق العمال".
وأكد السيسي، أن الدولة المصرية تسعى لزيادة إنتاجية الفدان الواحد.
وقال الرئيس السيسي:بدل ما يكون الإنتاج 80 ألف طن يكون 100 ألف طن.. ولما شوفت ترعة توشكى خلال أسبوع الصعيد سألت هل يمكن وضع سمك فيها وهل يعملوا مشكلة للري.. قولوا لا.. طب انت فاكر توشكى تقدر ترمى فيها سمك لمدة سنة و2 ويبقى عائد كويس.. هتجيبوه ازاى وتنقلوا ازاى.. لما بكلم قدام الناس.. اهتموا بلدكم وخافوا علينا".
وأضاف الرئيس السيسي،: الفرص موجودة.. وربنا سبحانه وتعالى.. مفيش عصفورة قالته لو طلعت هتاكلنى ولا.. بتطلع وتلاقى رزقها.. وده مخلوق ضعيف وربنا بيرزقنا.. ولازم نجرى على رزقنا.. ومفيش فرصة لحاجة زى كده والا لما تتعمل.
كما تحدث الرئيس السيسي عن سعر القصب، قائلا: "النواب قبل موسم القصب يطلبوا زيادة السعر.. والنبى زود السعر شوية.. نواب الشعب على دماغنا.. يا جماعة البرلمان بدل ما تقولى زود السعر.. طب هزود قد ايه 50 -100 جنيه.. انا بقولك على حاجة تزود 20 طن.. يعنى 50 % زيادة".
وأضاف الرئيس السيسي، خلال تعقيبه على حديث وزير الزراعة بحفل افتتاح مشروعات قومية جديدة في محافظات الصعيد: "يعنى الزيادة أكبر والإنتاج أكبر.. لما تقولى الفدان يجيب 65 ألف طن.. طب لا ليه.. ليه مش يكون 70 ألف طن.. صعب ولا عاوز متابعة وحرص وإصرار.. كتير من الكلام بيتقال".
كما تحدث الرئيس السيسي عن الثروة الحيوانية في مصر، قائلا: "قولت قبل كده اللى عنده رأس ماشية بتجيب 5-6 كيلو لبن.. وفيه رأس ماشية أخرى بتجيب 30 كيلو لبن.. ده بيظلم نفسه.. وانا بتكلم مع أهلنا في الصعيد.. لازم نطور في موضوع الماشية ده".
وأضاف الرئيس السيسي: "إحنا مهمومين بالصعيد ومستعدين للتغيير.. وبناخد القرار علشانكم.. خلى الناس تاخد من رأس الماشية اللى انتاجها أكبر.. ووزع اديله تانى علشان يبقى عندك حق.. الثروة الحيوانية في مصر إنتاجها فيه فرق في التسمين.. رأس ماشية تطلع نص كيلو في اليوم ورأس تطلع 1.3 كيلو في اليوم.. كده كده بأكل.. فيه اللى بأكله يدنى نص كيلو ولا يدينى 1.5 كليو.. لازم الدولة تتصدى وتشمر دراعاتها.. وعندنا برنامج لتحويل الوضع ده في مصر لمدة 3-5 سنوات.. ده يذبح وده الجديد لأنه أفضل في التسمين وكمية اللبن".
وأكد الرئيس السيسي، عن أن الدولة المصرية لديها الفرصة الكاملة من أجل زيادة الإنتاج في كل شيء.
وقال الرئيس: "عندنا فرص حقيقية.. لما نجيب أمام الله.. أقصى طاقة فى كل شي.. في القصب أقصى حاجة.. وبحيرة المنزلة وبحيرة ناصر اقصى حاجة هيجى خير.. لما نريح ونقول بالشتل والموضوع كلمتين منك وأنا اسمعهم طبعا لا.. ولازم الرسالة والإجراء يكون وصل للناس اللى تحت".
وأضاف الرئيس السيسي: "لازم مديرية الزراعة تعمل وتحط برامج مع المحافظة والمواطنين ومؤتمرات وكلام أنزل الأرض وأشيل القصب القديم بعد 5 سنين من دورة الزراعة.. ونحط الشتلة الجديدة لزيادة الإنتاج.. وحد يقول أشيل 50 ألف فدان واحط الشتلة ومش مهم الفارق لأنه هيعوض".
وقال الرئيس السيسي، عاوزين نغني الناس مش الناس تاخد دعم كل شوية وخلاص ومننهضش.. أوعوا تفتكروا رقم ال 62 مليار تكلفة فروق الفوائد لدعم المشروعات اتحط من غير تكلفة على الدولة.
وأضاف الرئيس السيسي، الناس قاومت فكرة مراكز تجميع الألبان، قائلا: "لما جينا نعمل الفكرة الناس قاومتنا رغم إن المصلحة في الجنب التاني..انا بدخلك في نظام مش محلى بدخلك كمنتج، وبقدر أقول إن حجم الفاقد تقل وجدارة المنتج تزيد..كان عندنا الف مركز قلنا نبدا 200 واصبح لدينا 160..الجاموس بتاعنا أتاخد لدولة عملتله تعديل وراثى، كان بيطلع 6 كيلو لبن عملته 25 كيلو لبن..يا نهار أبيض..طيب إحنا مش قادرين نخلى الجاموس مع الناس..أوزع من ده وادفع دعم لده..أيوه..ليه؟ لأن أنا هغير حياتك كنت هتطلع 5 كيلو دلوقتي 25".
وأكد الرئيس السيسي، أن المواطن لديه الخيارات الكافية لتعظيم دخله، فهناك 350 ألف فدان مزروعين بقصب السكر، يحققوا 40 ل45 ألف طن قصب للفدان، من خلال الري بالتنقيط.، والرى بالتنقيط زراعة كويسة يقلل تلوث ويوفر العمالة".
وتابع الرئيس السيسي: ال300 ألف فدان في 40 بنحو 1.2 مليون طن قصب، لو خليته 1.8 مزودتش أرض ولا ميه أنا زودت زرع عن طريق الزراعة الرأسية، فالمواطن صاحب مصلحة كما مازح السيسي، وزير الزراعة والري السيد القصير، قائلًا: متخفش هو احنا بنسعر دلوقتي.. ما تزودوا سعر السكر ؟ وخلى الناس كلها تكسب عمالين تمسكوا ده وده وتمسكوا ده".، انت زودت للفلاح 50 % اكنك اديته بدل ال 800 يبقا 1200 وأنت مدفعتش حاجة من جيبك".
وقال السيسي، أن الدولة المصرية لم تقترب من سعر تذكرة القطارات إلا بعد التطوير الكامل، قائلا: "قولت يا كامل متقربشى من سعر التذكرة إلا لما تحدث العربيات.. وكل قطارات مصر مفيش عربية ولا جرار جديد.. ومفيش على السكة كلها.. القاهرة والإسكندرية واسوان وبورسعيد.. مفيش قطار واحد قديم.. مفيش على أي خط في مصر عربية قديمة".
وتابع السيسي بشأن سعر تذكرة القطارات: "التسعير.. طب ما الوزير يشيلها أو رئيس الوزراء يشيلها.. انا عاوز يوم القيامة ربنا يشيلنى كل حاجة عملتها.. علشان كده بقول دلوقتى.. بنحط أسس لدولة جديدة كما نتمنى ونأمل.. طب ليه مش جبنا كام حادثة في السكة الحديد وتعليقات الناس ايه.. ونخلى وزير النقل لا مؤاخذة والحكومة.. وشوفوا عاملين ايه".
وأضاف الرئيس السيسي: "المسئولية مشتركة.. احنا عاوزين نجرى مع بعض.. غير كده مش هينفع.. وقطاع النقل وصل إلى تريليون و700 مليون جنيه.. يعنى 1700 مليار جنيه"
وقال الرئيس السيسي، إن تطوير الثروة الحيوانية فى مصر يحتاج إلى حلم من أجل التطوير، متابعًا: "ليه مش بنحلم.. أنا كوزير الزراعة أحلم وأدخل فى موضوع التطوير وأكسر في التحديات.. طب برنامج تطوير الثروة الحيوانية لزيادة الإنتاج كام سنة.. طب المحافظ ومديرية الزراعة معايا فى التطوير ده.. أتابع تطوير الثروة الحيوانية وأنجح وأفرح بالتطوير ده.. بقى عندى أمل كلما ما العدد يزيد فى تطوير الثروة الحيوانية ورؤوس الماشية اللى إنتاجها أكبر بيزيد.. هو انتوا مش بتحلموا ليه".
وأضاف الرئيس السيسي، خلال كلمته فى افتتاح مشروعات جديدة في محافظات الصعيد: "بقول الكلام ده لأن كل حاجة لها حلول.. لما كنا في اجتماع جامعة كفر الشيخ.. أحد رؤساء الجامعات قالى ممكن نعمل مصنع للنباتات العطرية.. الفرص موجودة مش لاقية اللى يعلمها.. أحنا معانا لسة فرص للتطوير والتحديث ومش خلصت".
وتابع الرئيس السيسي: "ممكن نعمل مصنع للتعامل مع الرمان بمليار جنيه.. بدل ما التصدير يكون رمان فقط هنطلع منه قيمة مضافة زيادة.. والمصنع ده هنشغل فيه الناس.. وطن الرومان بدل ما يكون ب100 دولار يبقى ألف دولار.. أنا بتكلم ليه وليه معملناش ده.. مزارع الرمان بقالهم 5-6 سننين.. مفيش مصنع يتعمل من الإنتاج بتاعهم ويعمله قيمة مضافة.. مش أنا اللى أعمله كدولة.. ليه مش جبت المستثمرين والمحافظ اللى عنده رمان فى محافظته وجاب الناس اللى شغالة.. والمقولين فى المحافظة.. والأثرياء في المحافظة.. تعالوا نعمل حاجة زى كده "يقصد المصنع".. وأنتوا تديروا "المصنع".. الدولة تدخل 50 % واعملوا المصنع ده.. والناس تشتغل ونحول الحاجة دى لكده "يبقى لها قيمة مضافة".. مهو الرمان بيحصلوا إيه بيترمى.. لكن لما أعمله قيمة مضافة للتصدير مش يترمى.. كيلو اللبن لما اعملوا مبستر ولبن بورده أفضل.. كل لما أعمل للحاجة قيمة مضافة بتقلل الفاقد".
كما شدد الرئيس السيسي، على أهمية المتابعة الدقيقة لكل الأمور، قائلا: "البلد مبتطلعش كده.. بتطلع بالمتابعة الدقيقة والإصرار والعناد.. محدش هيعيا من الجدية والهمة، لأن ربنا هيحميك.. اللى يهتم بالناس ربنا ميحمهوش؟ لا.. هيحميه ويحافظ عليه ويقويه طول ما انت بتجرى على الناس".
وأضاف الرئيس السيسي: "لازم تعرف ليه البلد دي ضاعت.. بحيرة ناصر كانت بتطلع 80 ألف طن سمك ليه نزل.. وزارة الزراعة متمثلة في هيئة الثروة السمكية الكلام ده مش بحيرة ناصر بس، كمان البردويل والمنزلة وكل البحيرات كانت بتطلع سمك قبل استزراع السمك طيب تقولى لو البحيرات بتطلع انتاجها كنا مش هنحتاج استزراع لا.. كنا هنحتاج علشان الزيادة السكانية"
كما شاهد الرئيس السيسي، بثا مباشرا من محطات القطارات، مثل اصطفاف القطارات الجديدة في محطة رمسيس بالقاهرة، ليعلق الرئيس السيسي على اصطفاف القطارات قائلا: "المفروض مش يكون فوق السقف ده حتة تراب.. وأى سقف أى منشأة بننساها.. وتحت مش يكون فيه حتة ورقة مرمية.. لا تراب فوق ولا لمبة محروقة.. ولا حاجة مرمية على الأرض".
وأضاف الرئيس السيسي، موجها حديثه لأحد المسئولين في محطة رمسيس بالقاهرة: "عارفين ليه الناس كانت بتضرب الأرض بالطوب.. علشان كده شكله كان تعبان.. كان رافضه.. لكن لما بقى كويس.. واللى يعمل كده نحاسبه".
وأكد الرئيس السيسي، أن كل وزراء النقل السابقين يعلمون ويرغبون في تغيير داخل القطاع متابعا: "الناس دى مش موجودة معانا.. هو احنا خلصنا ميكنة السكة كلها.. لا لسه.. بقول كده للناس تسمع ده.. الميكنة يعنى أيه.. يكون عندنا ألية حديثة تنظم الحركة والعمل على السكة الحديد بشكل بدون تدخل بشرى أو أقل حجم من التدخل البشرى.. وبالتالي لا يوجد أخطاء".
وأضاف السيسي: "إجراءات الأمان مع البشر بتكون أكبر وتأخد وقتا أطول.. المكنة مش بتغلط.. احنا نقدر نقول بالمطلق بقى عندنا سكة 100 % بعد الميكنة الكاملة.. لما بنتكلم على حركة يعنى معدات.. وبنية أساسية ورفع الكفاءة.. والخطوط والمكينة.. الأرقام المالية دى كبيرة اوى.. كان ممكن نقول ميكنة كل منطقة والتكلفة كام.. والمنطقة دى من أجل الميكنة تم الحصول على قرض من اليابان بكذا.. وهكذا كل منطقة يتم الميكنة فيها.. علشان الناس تبقى عارفه انه الكلام ده مش بموازنة الدولة.. ده عبء على الدولة والأجيال القادمة.. علشان محدش يقولى فين الرحمة".
وتابع الرئيس السيسي: "المسئولية مشتركة علشان البلد تتحرك.. لما نخلص ميكنة السكة الحديد هتكون زيها زى أي دولة متقدمة"
وقال الرئيس السيسي، أن تطوير محطة أسوان والسكة الحديد لا يقتصر على السياح فقط ولكن المواطن المصري،: "المواطن المصري يستحق للإنسان المصرى أولا".
وسآل الرئيس السيسي، الفريق كامل الوزير وزير النقل، عن دفع الأموال للهيئة الهندسية، ليرد عليه الفريق كامل قائلا: "لما كنت في الهيئة الهندسية كنت طالب من وزارة النقل عليها 44 مليون جنيه حصلت على 4 ملايين وضربوا على الباقى.. ولما جيت حاولت ادفع للواء إيهاب 40 مليون ولكنه طلب 44 مليون.. ولو سمحت لى تكون دى هدية لوزارة النقل وللشعب المصرى من القوات المسلحة"، ليرد عليه الرئيس السيسي: "الفريق محمد زكى وزير الدفاع بيقولى عليه 75 مليار"، ليرد عليه الفريق كامل الوزير: "ده جيشنا.. ولو مش يعملنا ويساعدنا مين اللى يعملنا ويساعدنا".